Транспорт жана байланыш министрлигинин маалыматына ылайык, учурда мамлекеттик органдар менен макулдашуу акыркы стадияда. Контрактчы керектүү техниканы жеткирүүнү уюштуруп, бетон заводу курулуп, жумушчу команда жыйналды.
Учурда долбоорго ылайык эки тоннел боюнча иштер жүргүзүлүүдө. Биринчи тоннелде 49 адис иштеп, 55 техника колдонулууда, өтүү 15 метрди түздү. Экинчи тоннелде негизги тоннел боюнча 13,2 метр жана параллелдүү штольнодо 12 метр өтүлгөн.
Жаңы автожолдун узундугу болжол менен 150 километрди түзүп, Ысык-Көлдүн түштүк жээгин Кыргызстан менен Кытайдын чек арасына байланыштырмакчы.
Долбоор эки тоннелди, 30дан ашык көпүрөнү, анын ичинде эки эстакадалык көпүрөнү жана башка коргоочу инженердик курулмаларды курууну камтыйт. Бул долбоорду ишке ашыруу мөөнөтү болжол менен беш жылды түзөт.
Барскоон — Бедел автожолу Кыргызстан үчүн негизги инфраструктуралык долбоорлордун бири болуп саналат. Ал Кытай менен чек арага альтернативдүү маршрут түзүп, Торугарт жана Иркештам өткөрмө пункттарын жүктөн чыгарууга жардам берет.
Маршрут Ысык-Көл облусунун бийик тоолуу аймактары аркылуу өтөт, бул тоннелдерди, көпүрөлөрдү жана башка коргоочу курулмаларды куруу зарылдыгын шарттайт. Долбоор өлкөнүн транзиттик потенциалын өнүктүрүүгө, жүк ташууларды тездетүүгө жана Кытай Эл Республикасымен соода-экономикалык байланыштарды бекемдөөгө багытталган.
