Келишимдин алкагында 2,3 миллиард доллар өлчөмүндө кредиттик каржылоо бөлүнөт. Бул каражаттар «Кытай – Кыргызстан – Өзбекстан» темир жолун куруу долбоорун ишке ашыруу үчүн белгиленген графикке ылайык жумшалат. Кредит алууга «Кытай – Кыргызстан – Өзбекстан» темир жол компаниясы жооптуу болот.
Кол коюу аземине жогорку кызматтагы адамдар, анын ичинде премьер-министрдин орун басары, суу ресурстары, айыл чарба жана кайра иштетүү өнөр жайы министри Бакыт Торобаев, ошондой эле тиешелүү мамлекеттик мекемелердин жана финансылык уюмдардын жетекчилери катышты. Иш-чарада долбоорду түздөн-түз ишке ашырууга катышкан өкүлдөр да болду.
Кыргыз Республикасынын Транспорт жана байланыш министрлигине караштуу «Кыргыз темир жолу» мамлекеттик ишканасынан иш-чарага: башкы директор А. Сакиев жана башкы директордун биринчи орун басары Р. Спасский катышты.
