Кыргыз Республикасынын Табигый ресурстар министрлиги геология тармагындагы жумушсуздук абалы жана бул тармактагы компаниялардагы жергиликтүү жумушчулардын пайыздык катышы тууралуу маалымат бөлүштү.
Инфографикада көрсөтүлгөн маалыматка ылайык, бардык кызматкерлердин 93% жергиликтүү тургундардан турат. «Бул жергиликтүү жерде жумуш орундарын түзүүнү тастыктап, жарандардын социалдык-экономикалык абалын жакшыртууга жардам берет», - деп белгиленет расмий билдирүүдө.
Мындан тышкары, Кыргыз Республикасынын «Жер астындагы байлыктар жөнүндө» мыйзамынын 20-беренесине ылайык, жер ресурстарын пайдалануу менен алектенген компаниялар өлкөдө иштеп жаткан кызматкерлердин жалпы санынын 90% дан кем эмес Кыргыз Республикасынын жарандарын жумушка алууга милдеттүү.
«Бардык лицензияланган ишканалар чет элдик адистерди тартууда белгиленген пайыздык катышты так сактоого милдеттүү», - деп кошумчалашты министрликтен.
