Италиядагы жумушчу сапарынын учурунда Кыргызстандын Мамлекеттик салык кызматынын төрагасы Алмамбет Шыкмаматов Виченца шаарында өткөн «Vicenzaoro» зергерчилик көргөзмөсүнө катышты.
Бул иш-чарада ГНСтин башчысы зергерчилик тармагындагы актуалдуу тенденциялар, жаңы материалдар жана технологиялар менен таанышып, Италиянын алдыңкы зергердик компанияларынын өкүлдөрү менен жумушчу жолугушуулар өткөрдү.
Анын ичинде ал Bvlgari тобунун жана LVMH брендеринин туруктуу өнүгүү жана корпоративдик социалдык жоопкерчилик боюнча директору Элеонора Риццутомен жолугушту, бул тууралуу ГНСтин басма сөз кызматы билдирди.
Жолугушуунун учурунда Алмамбет Шыкмаматов Кыргызстандын зергерчилик тармагынын учурдагы абалы, жүргүзүлүп жаткан реформалар жана жергиликтүү зергердик өндүрүштү өнүктүрүүгө багытталган мамлекеттик колдоо чаралары жөнүндө айтып берди.
Кыргызстандын кымбат баалуу металлдар жана таштарды кайра иштетүү боюнча мүмкүнчүлүктөрү, ошондой эле чет өлкөлүк инвестицияларды тартуу жана ири эл аралык бренддер менен өнөктөштүктү түзүү перспективалары да көңүл борборунда болду.
Жолугушуунун жыйынтыгында тараптар Bvlgari базасында кыргызстандык зергерлерди даярдоо боюнча макулдашууга келишти.
Мындан тышкары, зергердик жабдууларды өндүрүүчүлөр жана экспорттоочулардын ассоциациясынын президенти Масимо Полеромен жолугушуу өткөрүлүп, бул тармакта өз ара кызматташуу маселелери талкууланды.
Шыкмаматов биргелешкен иш-аракеттердин бир нече варианттарын сунуштады, анын ичинде Кыргызстанда зергердик буюмдарды өндүрүүнүн толук циклин уюштуруу үчүн AFEMO компаниясынан жабдууларды сатып алуу.
Ошондой эле Trevi Group S.r.l. жана Damiani Group менен эки тараптуу жолугушуулар өткөрүлдү.
Бул талкуулардын жүрүшүндө тараптар зергерчилик тармагында заманбап технологиялар жана жабдууларды колдонуу, лабораториялык шарттарда кымбат баалуу металлдарды талдоо үчүн чечимдер, ошондой эле зергердик буюмдарды өндүрүү жана кайра иштетүүдө колдонулган технологияларды карашты.
Кыргыз Республикасынын аймагында италиялык алдыңкы технологияларды киргизүү жана жергиликтүү зергердик ишканаларда жана профилдик лабораторияларда практикалык колдонуу мүмкүнчүлүгү да талкууланды.
Жолугушуунун жыйынтыгында Кыргызстандын жергиликтүү рыногун изилдөө жана кызматташтыкты улантуу, биргелешкен долбоорлорду ишке ашыруу боюнча кошумча сүйлөшүүлөрдү өткөрүү үчүн италиялык зергердик буюмдардын өндүрүүчүлөрүнүн Кыргызстанга сапары боюнча макулдашууга жетишилди.
Vicenzaoro көргөзмөсү зергерчилик буюмдарды, кымбат баалуу таштарды, жабдууларды жана технологияларды көрсөтүүчү, ошондой эле бизнес байланыштарды түзүү, тажрыйба алмашуу, дүйнөлүк тренддерди изилдөө жана зергерчилик тармагында эл аралык кызматташтыкты өнүктүрүү боюнча алдыңкы профессионалдык B2B аянтча экенин белгилөө маанилүү.
