Келечектеги реформаларды жана приоритеттүү багыттарды карап чыгып, Марлен Маматалиев санариптештирүү Жогорку Кеңештин ишмердүүлүгүндө негизги басымдардын бири болоорун белгиледи. Ал: «Мен Президенттин администрациясында санариптик технологияларды киргизүү чечим кабыл алуу процессин кыйла тездетерин көрдүм, бул, өз кезегинде, жалпы иштин натыйжалуулугун жогорулатат. Бул ошондой эле адам ресурстарын рационалдуу пайдаланууга жана бюджеттик каражаттарды үнөмдөөгө мүмкүндүк берет. Мисалы, 2024-жылы санариптештирүүнүн натыйжасында 1 млрд 205 млн сом үнөмдөлдү. Бул каражаттарды социалдык объектилерди курууга жана пенсиялар менен жөлөк пулдарды көбөйтүүгө жумшаса болот. Эми ушундай эле чаралар парламентте да киргизилиши керек», — деп билдирди.
Маматалиев өз сунуштарынын алкагында документооборот жана мыйзам чыгаруу ишмердүүлүгүндө кагаздын колдонулушун азайтууга көңүл бурду. Жакын арада ар бир депутатка бардык керектүү маалыматты санарип форматта алуу үчүн планшет берилет. «Планшетте төрт папка болот: биринчи — Жогорку Кеңештин жыйналыштарынын материалдары үчүн, экинчи — профильдик комитеттердин материалдары үчүн, үчүнчү — депутаттык топтордун жыйналыштары үчүн, ал эми төртүнчүсү — ар кандай маселелер боюнча маалымат үчүн. Бардык маалыматтар алдын ала берилет, бул иштин натыйжалуулугун жогорулатат жана депутаттарга кайсы жерде болбосун иш-чараларга даярданууга мүмкүнчүлүк берет», — деп тактады торага.
Мындан тышкары, Маматалиев профильдик комитеттердин жыйналыштарына Министрлер Кабинетинин өкүлдөрүнүн катышуусун камсыз кылуунун зарылдыгын билдирди. «Жыйналыштарда ар кандай суроолор пайда болушу мүмкүн болгондуктан, биз көбүрөөк кызмат адамдарын чакырууну пландап жатабыз. Келечекте мамлекеттик органдардын жетекчилери жыйналыштарга онлайн катыша алышат», — деп кошумчалады ал.
Ошондой эле депутаттардын аймактардагы шайлоочулар менен онлайн жолугушууларын уюштуруу шарттарын түзүү жөнүндө айтылды. Жогорку Кеңештин конокторунун ыңгайын жакшыртуу үчүн беш коомдук кабылдоо бөлмөсүн жана энелер үчүн балдар менен бөлмө ачуу пландалууда.
