Социалдык өнүгүү министринин орун басары Жылдыз Полотова Кызыл-Кия шаарында үй-бүлөсүз адамдар үчүн пансионат ачты. Бул тууралуу ведомствонун басма сөз кызматы билдирет.
«Социалдык өнүгүү министрлиги Кыргызстандагы мамлекеттик орган болуп, "Мамлекеттик социалдык заказ жөнүндө" мыйзамды ишке ашырат. Мыйзамдын алкагында бюджеттен өкмөттүк эмес уюмдарга кыйын кырдаалга туш болгон адамдарга жардам берүү үчүн каражат бөлүнөт. Бул - ден соолугунан мүмкүнчүлүгү чектелген чоңдор жана балдар, ата-энесиз калган балдар же мыйзам менен кагылышта болгон адамдар. Мамлекеттик социалдык заказдын алкагында бүгүн Кызыл-Кия шаарында үй-бүлөсүз адамдар үчүн пансионат ачып жатабыз», - деди Жылдыз Полотова ачылышта.
Ачылышта шаар мэри А.Халмурзаев, шаардык кенештин төрагасы А.Матмусаев, жергиликтүү өкмөттүк эмес уюмдардын жетекчилери, диний ишмерлер, жергиликтүү кенештин депутаттары да катышты.
Минсоцразвитиянын маалыматы боюнча, үй-бүлөсүз адамдар үчүн пансионат ачуу боюнча конкурс "Рема" коомдук кайрымдуулук фондуна берилди. Бул конкурс алкагында үй-бүлөсүз адамдар, ден соолугунан мүмкүнчүлүгү чектелген адамдар, кыйын кырдаалдагы балдар жана кары адамдар үчүн жети борбор ачылат.
