Министрликтин басма сөз кызматынын маалыматына ылайык, жолугушуу Кыргызстандын Россиядагы элчилигинде өтүп, саламаттыкты сактоо тармагында иштеген 60тан ашык дарыгерди чогултту.
Талкууланган негизги темалар медициналык кадрларды мекенине кайтаруу жана Кыргызстандын саламаттыкты сактоо системасында алардын кесиптик ишмердүүлүгү үчүн ыңгайлуу шарттарды түзүү маселелери болду.
Жолугушуунун жүрүшүндө министр саламаттыкты сактоо тармагында жүргүзүлүп жаткан реформалар, айлык акынын жогорулашы, медициналык мекемелерди модернизациялоо, инфраструктураны өнүктүрүү жана медицина кызматкерлеринин эмгек шарттарын жакшыртуу боюнча чаралар тууралуу айтып берди. Социалдык колдоо, карьералык өсүш жана жаш адистер үчүн татыктуу шарттарды түзүүгө көңүл бурулду.
Дарыгерлер чет өлкөдөгү иш тажрыйбасы менен бөлүшүп, Кыргызстандагы жумушка орношуу, адаптация жана карьералык мүмкүнчүлүктөр боюнча сунуштарын жана суроолорун билдиришти.
Жолугушуунун соңунда бир нече жаш адистер кайтып келип, Кыргызстандын саламаттыкты сактоо тармагында карьерасын улантууга кызыгуусун билдиришти.
«Биздин саламаттыкты сактоо системабыз өз ишине берилген квалификациялуу жана мотивацияланган адистерге муктаж. Мамлекет дарыгерлерди жана медициналык кызматкерлерди кайтарууга, алардын кесиптик өнүгүшүнө жана калктын ден соолугун чыңдоого салым кошуусуна кызыкдар. Биз, өз кезегибизде, колдоо көрсөтүүгө жана иштөө жана жашоо үчүн ыңгайлуу шарттарды түзүүгө даярбыз», — деп белгиледи Каныбек Досмамбетов.
