Президент социалдык тармактардагы баракчасында учурда Жакынкы Чыгыш өлкөлөрүнөн жарандарды мекенине кайтаруу боюнча иштер улантылып жатканын белгиледи.
"Бириккен Араб Эмирлигинде учууларга киргизилген чектөөлөргө байланыштуу, биз Оман бийликтери менен 300 адамды чыгаруу үчүн эки чартердик рейс уюштуруу боюнча макулдаштык. Алды менен аялдар жана балдар эвакуацияланат. Бардыгын тынчтык жана сабырдуулук сактоого чакырам," - деп кошумчалады Жапаров.
Президент ошондой эле ОАЭден рейстерди аткарууга уруксат алганда, калган жарандарды бир күндүн ичинде эвакуациялоого мүмкүнчүлүк болоорун белгиледи.
28-февралда таң эрте Израиль жана АКШ Ирандын аймагына сокку урду. Дональд Трамп Ислам Республикасынын ядролук программасын жок кылуу ниетин билдирди.
Мунун жооп катары Иран Израиль жана АКШнын аскер базалары жайгашкан Жакынкы Чыгыштагы башка өлкөлөргө сокку ура баштады. Сокку Бахрейн, Катар, Кувейт, Абу-Даби жана Дубайга (ОАЭ) жана Эр-Риядга (Сауд Аравиясы) багытталды.
Америка-израиль операциясынын натыйжасында Ирандын жогорку лидери аятолла Али Хаменеи өлтүрүлдү. Кийинчерээк алган жаракаттарынан анын аялы - Мансуре Ходжасте да көз жумду.
Трамп ошондой эле Ирандагы аскердик аракеттер төрт жумага созулары тууралуу билдирди. Иранда АКШ жана Израилге каршы жихад жарыяланды, бардык сүйлөшүүлөрдөн баш тартуу менен.
Жакынкы Чыгыштагы конфликт глобалдык абалга, анын ичинде Кыргызстанга да таасир этүүдө. Учурда миңдеген туристтер ОАЭде калып жатышат. Чет өлкөдөгү кыргызстандыктар үчүн элчиликтердин жана консулдуктардын байланыш номерлерин бул жерден табууга болот.
