Жолугушуунун жүрүшүндө эки өлкөнүн өкүлдөрү Кыргызстандын жана Кытайдын саламаттыкты сактоо тармагындагы учурдагы абалын жана келечектеги кызматташуу мүмкүнчүлүктөрүн талкуулашты.
Кызматташтык Кыргызстандын саламаттыкты сактоо министрлиги менен Кытайдын Саламаттыкты сактоо мамлекеттик комитети ортосундагы келишимдин алкагында жүргүзүлүүдө, ошондой эле өкмөттөр аралык соода-экономикалык кызматташтык комиссиясы аркылуу жана Шанхай кызматташтык уюму алкагында активдүү өнүгүүдө.
Дамир Осмонов Кытай тараптын өлкөнүн саламаттыкты сактоо системасын жакшыртуудагы маанилүү ролун, гуманитардык демилгелерди, медициналык жабдууларды жана дары-дармектерди жеткирүүнү, ошондой эле кыргыз адистеринин кытай медициналык мекемелеринде билим берүү программаларын уюштурууну белгиледи.
Кытай тарап практикалык кызматташтыкты тереңдетүү үчүн бир катар жаңы демилгелерди сунуштады. Атап айтканда, катаракта оорусу менен жабыркагандар үчүн акысыз операцияларды өткөрүүнү жана тума жаракаттары бар балдарга медициналык жардам көрсөтүүнү камтыган «Экспресс ден-соолук — жаркын саякат» долбоорун ишке ашыруунун деталдары талкууланды.
Буга чейин Кыргызстандан оор жүрөк кемтиги бар 10 бала жыл сайын Кытайда операциядан өтөөрү маалымдалган.
Сүрөт МЗ КР
Мындан тышкары, тараптар Синьцзян-Уйгур автономдуу районунун элдик ооруканасы менен кызматташуу мүмкүнчүлүгүн, өз ара визиттерди уюштуруу жана биргелешкен медициналык долбоорлорду, мисалы, биргелешкен оорукананы түзүүнү талкуулашты.
Ошондой эле кыргыз-кытай салттуу медицина боюнча илимий-изилдөө борборун түзүү жана фармацевтика жана дары өсүмдүктөрүн пайдалануу тармагындагы кызматташтыкты өнүктүрүү маселеси көтөрүлдү.
Жолугушуунун соңунда эки тарап медициналык инфраструктураны өнүктүрүүгө, медициналык кызматтардын сапатын жакшыртууга жана калктын заманбап медициналык технологияларга жеткиликтүүлүгүн кеңейтүүгө багытталган эки тараптуу мамилелерди мындан ары чыңдоого даярдыктарын бекитти.
