Министрликтин маалымат кызматы билдиргендей, жолугушуу профессионалдык, техникалык жана туристтик билим берүү тармагындагы эки тараптуу кызматташтык маселелерине, ошондой эле мурунку кол коюлган Биргелешкен билдирүүгө ылайык технологияларды алмашууга арналган.
Онлайн жыйынга Кыргызстан тараптан билим берүү министринин орун басарлары Альберт Махметкулов жана Лира Самыкбаева, ошондой эле Кыргызстандын Австриядагы элчиси Нуржан Шайлдабекова катышты. Австрия тараптан Австриянын экономикалык кызматташтык жана өнүктүрүү агенттигинен Доротеа Ауэр, Федералдык финансылык министрликтен Михаэль Матиашитц, ошондой эле Klessheim туристтик колледжинин жана Австрия технологиялык корпорациясынын өкүлдөрү катышты.
Жолугушуунун күн тартибинде мурунку жетишилген макулдашууларды ишке ашыруу, туристтик инфраструктурада кызматташтык жана темир жол транспорту үчүн адистерди даярдоо маселелери, ошондой эле Ысык-Көл облусунда туристтик мектеп түзүүнүн практикалык аспекттери каралды.
Жолугушуунун катышуучулары кышкы туризм жана кышкы спорт түрлөрү боюнча билим берүү процессин уюштуруу, инфраструктураны даярдоо жана өнүктүрүү этаптарын, анын ичинде имараттарды реконструкциялоону жана австриялык окутуу методикаларын эң жакшы эл аралык практикаларга негизделип киргизүүнү талкуулашты.
Догдуркүл Кендирбаева туристтик мектеп түзүү маселелери боюнча терең изилдөө жүргүзүүнүн зарылдыгын жана Австриянын ментордук жана методикалык тажрыйбасынын маанилүүлүгүн белгиледи.
Австрия тарап практикалык жана методикалык колдоо көрсөтүүгө, педагогдорду жана адистерди даярдоого, ошондой эле заманбап моделдер жана технологиялар негизинде билим берүү борборун түзүүгө жардам берүүгө даяр экенин билдирди.
Талкуулоонун жыйынтыгы боюнча тараптар мындан аркы өз ара аракеттенүү жана биргелешкен иш-чаралар планынын иштелип чыгышы боюнча макулдашууга келишти.
