Кыргызстан Россия рыногу эт-сүт продукциясын жеткире баштайт
Тизме сүт жана эт продукцияларын өндүрүү, ошондой эле балыкты кайра иштетүү менен алектенген 15 кыргызстандык ишкананы камтыйт.
- КРнын ЕАЭБге кошулуу үчүн аткарган иши бизге РФга кайрылууга жана биздин ишканалардын продукциясын анын рыногуна, айрыкча термикалык иштетүүдөн өткөн продукцияны киргизүүгө уруксат алууга мүмкүнчүлүк берди, - деди Олег Панкратов. - Ошентип, 2016-жылдын 8-февралынан тарта 15 кыргызстандык өндүрүүчүнүн Россия Федерациясынын аймагына төмөнкү тобокелдиктеги продукцияларды жөнөтүүгө уруксат берилди: термикалык иштетүүдөн өткөн даяр эт продукциясы, термикалык иштетүүдөн өткөн сүт продукциясы, ошондой эле балык продукциясы.
Россия Федерациясына продукция жөнөтүүгө укугу бар КРнын ишканаларынын тизмеси Россельхознадзордун расмий сайтында жайгаштырылган. Кыргызстандан Россияга мындай продукцияларды жөнөтүү боюнча тажрыйканын жоктугуна байланыштуу, көрсөтүлгөн продукцияны коопсуздук көрсөткүчтөрү боюнча изилдөө үчүн ар бир кыргызстандык өндүрүүчүнүн продукциясынын түрүнө карабастан, кеминде 10 үлгү алуу менен күчөтүлгөн лабораториялык контролдоо режиминде киргизүүнү камсыз кылуу зарыл.
- Эгер мурда КР өз продукциясын Казакстандын чектеш аймактарына гана жөнөтүүгө мүмкүнчүлүгү болсо, азыр биздин ишканалар чоң Россия рыногуна чыгууга мүмкүнчүлүк алышты. Биздин продукциянын Россияда ийгилиги, биринчи кезекте, өз ишканаларыбыздан көз каранды - алар өз продукцияларын Россия рыногунда канчалык активдүү жылдыра алышат, - деп түшүндүрдү вице-премьер.
