Кабулда, Афганистандын борборунда, Кыргыз Республикасынын Экономика жана соода министрлигинин алдындагы «Кыргыз Экспорт» борбору тарабынан уюштурулган бизнес форуму өттү. Бул тууралуу Кыргыз Республикасынын Экономика министрлигинин басма сөз кызматынан маалымдалды.
Иш-чаранын жүрүшүндө «Кыргыз Экспорт» борборунун директору Урмат Такиров, Афганистандын катышуучуларына Кыргызстандын экспорттук мүмкүнчүлүктөрүн сунуштады. Форумдун жыйынтыгында товарлар жана кызмат көрсөтүүлөрдү жеткирүү боюнча 157 миллион доллар суммасында 11 ниет келишими түзүлдү. Бул келишимдер телекоммуникация жабдуулары, цемент, бут кийим, дары-дармек, бал, логистика кызматтары жана айыл чарба продукциясын камтыйт.
Бизнес форумга эки өлкөнүн мамлекеттик органдары жана бизнес чөйрөсүнөн 100дөн ашык өкүл катышты.
Кыргыз делегациясын Кыргыз Республикасынын экономика жана соода министри Бакыт Сыдыков жетектеди. Кабулдагы анын визити учурунда Кыргызстандын соода үйү ачылды, ошондой эле өз ара сооданы кеңейтүү, экспорттук кызматташтыкты өнүктүрүү жана биргелешкен долбоорлорду ишке ашыруу боюнча эки тараптуу жолугушуулар өткөрүлдү.
Кыргыз Республикасынын экономика жана соода министрлиги форумду өткөрүүгө уюштуруу жардамын көрсөткөн Кыргыз Республикасынын Афганистандагы элчилигине ыраазычылык билдирет.
