Ал бала кезинен комузда ойноп, искусствосун сүйүп, дүйнөнү улуттук маданият менен тааныштыруу үчүн аракет кылууда.
«Бул жылы комузду колума алганыма жети жыл болду. Бул убакыт ичинде көптөгөн конкурстарга катышып, чоң жетишкендиктерге жеттим. Ар кандай жерлерди көрүп, тажрыйба топтодум. Өткөн жылы окуумду ийгиликтүү аяктап, диплом алдым. Азыр кошумча билим алууну улантып жатам. Комуздун жардамы менен, кудай буйруса, Түркияга барабыз. Түрк эли комузду чындап жогору баалайт. Алар биздин ата-бабаларыбыз — кыргыздар экенин жакшы билишет. Алар комузду сыйлуу аспап катары кабыл алышат. Түрктөр кыргыздарды жылуу кабыл алып, урмат менен мамиле кылышат», - деп белгиледи жаш комузчу.
Нуралинин айтымында, ал мурда бир нече ири конкурстарга катышкан. Анын эң чоң жетишкендиктеринин бири — чопо чоор боюнча сыйлык алгандыгы. Азыр ал «Достук шаңы» эл аралык конкурсуна өзүнүн чеберчилигин көрсөтүүдө.
«Комуз биз үчүн — жөн гана музыкалык аспап эмес. «Кыргыз» дегенде биринчи Манас ата, андан кийин комуз эске түшөт. Ошондуктан комуз кыргыз элдин символу деп айтууга болот. Аны ойноп көргөн гана адам анын терең маанисин жана руханий күчүн чын эле түшүнөт», - деди ал.
Комузда ойноп жатуу Таалайбековдордун үй-бүлөсүндө да өзгөчө орунду ээлейт. Үйдө комузда атасы жана көптөгөн туугандары ойноп, анын искусствого болгон кызыгуусун дагы да арттырды.
«Бала кезимде «Манас» эпосунан үзүндүлөрдү айтып берчүмүн. Күрөш боюнча мелдештерге жана арифметика боюнча конкурстарга катышчумун. Мындан тышкары, кыл кыякта жана фортепианодо ойноп үйрөнгөм. Азыр өзүмчө гитарада ойноп жатам. Учурда 40тан ашык мелодияны билем. Сценада эң негизгиси — толкунуй бербөө. Эгер толкундансаң, ойноп жатканда жаңылышып кетишиң мүмкүн», - деп кошумчалады ал.
Жаш таланттын жетишкендиктеринде үй-бүлөнүн колдоосу чоң роль ойнойт. Ал ошондой эле өзүнүн ментору Назгүл Жөлөгөновага ыраазычылык билдирип, анын эмгеги жана ишеними тууралуу өзгөчө белгиледи.
Азыр Нурали Карыбек уулу Акматаалы атындагы орто мектептин 8-классында окуйт. Ал келечекте улуттук аспапты даңазалап, дүйнөнү кыргыз мадияты менен тааныштыруу максатын койгон.
