Жолугушууда эки тараптуу мамилелердин өнүгүү мүмкүнчүлүктөрү талкууланды
Бүгүн, 18-февралда, Кыргыз Республикасынын президенти Садыр Жапаров Европалык парламенттин делегациясы менен жолугушту, делегацияны Борбордук Азия менен байланыштар боюнча комитеттин төрайымы Джузеппина Принчи башкарып барды.
Делегациянын курамына ар кандай өлкөлөрдүн депутаттары кирди: Джузеппина Принчи (Италия), Свен Симон (Германия), Тьерри Мариани (Франция), Антонин Станек (Чехия), Кристиан Вигенин (Болгария), Томаш Фрёлих (Германия), Кьяра Джемма (Италия) жана Юсси Сарамо (Финляндия).
Жолугушуунун жүрүшүндө Кыргызстан менен Европалык Союздун ортосундагы кызматташтыкты улантуу маселелери талкууланды, парламенттер аралык байланыштарды бекемдөө, адам укуктарын коргоо жана сөз эркиндигине көңүл бурулду.
Президент Европалык Союз менен мамилелерди өнүктүрүү Кыргызстандын тышкы саясатындагы негизги багыт экенин белгилеп, кызматташтыкты тереңдетүүгө болгон ниетин растады.
Садыр Жапаров ошондой эле Жогорку Кеңеш менен Европалык парламенттин ортосундагы парламенттер аралык кызматташтык комитетинин жыйынынын маанилүүлүгүн белгилеп, бул механизмди натыйжалуу диалог үчүн маанилүү деп атады.
«Биз парламенттер аралык өз ара аракеттенүүнү ички саясат, тышкы мамилелер жана регионалдык коопсуздук маселелери боюнча ачык пикир алмашуу үчүн маанилүү канал катары карайбыз», - деп баса белгиледи ал.
Өз кезегинде, Джузеппина Принчи жылуу кабыл алганы жана эки тарап үчүн маанилүү маселелерди талкуулоого мүмкүнчүлүк бергенине ыраазычылык билдирди, Европалык Союз менен Кыргызстан ортосундагы мамилелердин оң өнүгүшүн белгиледи.
Европарламенттин депутаттары ошондой эле акыркы жылдардагы Кыргызстандын жетишкендиктерин мактап, социалдык-экономикалык өнүгүүдө оң өзгөрүүлөрдү жана мамлекеттик башкарууну модернизациялоо боюнча аракеттерди белгилешти.
Делегациянын мүчөлөрү билим берүү тармагында, студенттик алмашуу программаларын жана жаштар үчүн жаңы мүмкүнчүлүктөрдү түзүү боюнча байланыштарды тереңдетүү зарылдыгына көңүл буруп, конструктивдүү диалогду улантууга даярдыктарын растады.
Жолугушуунун жыйынтыгы боюнча тараптар Кыргызстан менен Европалык Союздун ортосундагы кызматташтыкты өз ара кызыкчылыктарды камтыган приоритеттүү тармактарда улантууга ниеттеништи.
Садыр Жапаров Кыргызстандын кызматташууга ачык экенин баса белгилеп, бул жолугушууну Европалык Союз менен диалогду тереңдетүү үчүн маанилүү кадам катары баалады.
Сүрөт www
