26-февраль, Кыргызстандын тышкы иштер министри Жээнбек Кулубаев Лондондо «Ортолук Азия – Улуу Британия» форматында министрлер деңгээлиндеги жолугушууга катышты. Бул тууралуу Кыргызстандын Тышкы иштер министрлиги маалымдады.
Жолугушууга Өзбекстандын, Казакстандын, Тажикстандын жана Түркмөнстандын тышкы иштер министрлери, ошондой эле Улуу Британиянын тышкы иштер боюнча мамлекеттик катчысы катышты.
Жолугушууда жаңы регионалдык форматта диалогду күчөтүү, соода-экономикалык, инвестициялык, транспорттук кызматташтык жана актуалдуу коркунучтарга каршы биргелешкен аракеттер тууралуу маселелер көтөрүлдү. Жолугушуунун катышуучулары «С5+UK» форматы системалуу диалог жана кызматташтыкты тереңдетүү боюнча практикалык кадамдар үчүн маанилүү платформа боло алаарына келишти.
Кулубаев өз сөзүндө Ортолук Азиянын Азия менен Европа ортосундагы негизги геосаясий регион катары маанилүүлүгүн, бай энергетикалык ресурстарын, чоң адамдык потенциалын жана транзит үчүн кеңири мүмкүнчүлүктөрүн белгиледи. Ал Кыргызстандын Өзбекстан жана Тажикстан менен чектешкен маселелерин ийгиликтүү чечүү эффективдүү кызматташтыктын үлгүсүн көрсөтүп, Улуу Британияны кошкондо башка өлкөлөр менен экономикалык жана инвестициялык байланыштар үчүн жаңы горизонтторду ачарын баса белгиледи.
Министр ошондой эле соода, финансы, энергетика, транспорт, климат жана билим берүү тармактарында Улуу Британия менен эки тараптуу жана регионалдык өз ара аракеттешүүнү кеңейтүүнүн маанилүүлүгүн белгиледи. Ал «C5+UK» форматындагы ийгилик конкреттүү долбоорлор, инвестициялар жана билим берүү инициативалары аркылуу көрүнөт деп үмүттөнөөрүн билдирди, ошондой эле кызматташтык үчүн туруктуу механизмдерди түзүү зарылдыгын айтты.
Санкциялар боюнча маселелерди талкуулоодо Кулубаев Ортолук Азиянын Улуу Британия менен соода жана финансылык кызматташтыгына бир тараптуу чектөө чараларынын терс таасирине байланыштуу тынчсыздануусун билдирди. Ал Кыргызстандын эл аралык экономикалык байланыштарды саясий жактан пайдаланууга каршы экенин жана өз ара кабыл алынуучу чечимдерди табуу үчүн ачык диалогго даяр экенин баса белгиледи.
