Акыркы жылдары Кыргызстанда бөйрөк жетишсиздигинен жабыркаган адамдардын санынын өсүшү байкалууда. Бул тууралуу Жогорку Кенештин жыйынында саламаттык сактоо министри Дамир Осмонов билдирди.
Анын маалыматына ылайык, мындай бейтаптардын саны 2010-жылы 2860тан азыркы 4478ге чейин өскөн.
Дүйнөлүк саламаттык сактоо уюмунун статистикасы боюнча, орто эсеп менен 1 миллион калкка 830 бөйрөк жетишсиздигинен жабыркаган бейтап туура келет. Казакстанда бул көрсөткүч 800, Россияда — 900, ал эми Кыргызстанда — 1 миллион адамга 630.
Министр оорунун өнүгүшүнө диабет, пиелонефрит жана жогорку кан басымы сыяктуу факторлор себеп болорун белгиледи.
Учурда өлкөдө 54 гемодиализ борбору иштеп жатат, алардын 2си мамлекеттик, 4ү мамлекеттик-менчик өнөктөштүк алкагында, ал эми 48и — жеке. Бишкекте 11 борбор, Ысык-Көл облусунда — 5, Чүй облусунда — 6, Ош облусунда — 6, Жалал-Абад облусунда — 8, Талас облусунда — 3, Баткен облусунда — 6 жана Нарын облусунда — 3 борбор жайгашкан.
Бул мекемелерде 61 врач жана 106 медициналык кызматкер эмгектенет.
