Жыйында талкууланган негизги маселелердин бири Рамазан айынын башталышы жана Орозо айт майрамынын датасын аныктоо болуп саналат. Иш-чаранын катышуучулары бул даталарды аныктоо үчүн ар кандай ыкмаларды талкуулап, диний пикирлер менен алмашышууда.
Кыргызстандан келген делегациянын курамына ДУМК КРнын маалымат камсыздоо бөлүмүнүн жетекчиси Абибилла ажы Кадырбердиев жана Баястан Марат уулу кирет. Жыйынга Фетва комитетинин мүчөлөрү, диний мекемелердин лидерлери жана түрк мамлекеттеринен белгилүү ислам илимпоздору чогулду.
Иш-чаранын ачылышында Өзбекстан мусулмандарынын диний башкармалыгынын орун басары Зайниддин Эшонкулов Самарканддын ислам маданиятынын жана Улуу Жибек жолунун борбордук түйүндөрүнүн бири катары маанилүү тарыхый жана руханий мааниси бар экенин белгиледи.
ОТГнын башкы катчысынын орун басары доктор Мирвохид Азимов жыйынды Самаркандда өткөрүүнүн маанилүүлүгүн белгилеп, Фетва кеңешинин иши түрк мамлекеттери арасында руханий биримдикти бекемдөөгө жана диний чөйрөдөгү кызматташтыкты өнүктүрүүгө багытталганын айтты.
Календардык маселелерден тышкары, катышуучулар ислам укугунун маанилүү аспекттерин, анын ичинде айыл чарбасындагы «ушра» маселелерине өндүрүш чыгымдарынын таасирин да карап чыгышууда.
Ошондой эле, фетва чыгаруу жана алуу процессинде жасалма интеллектти колдонуу мүмкүнчүлүктөрү жана чектөөлөрү талкууланды.
Өткөн жылы ОТГга мүчө өлкөлөрдүн диний башкармалыктарынын VI саммити биринчи жолу Кыргызстанда өткөндүгүн эске салуу керек.
