Ички иштер министрлиги (ИИМ) интернетте жайылып жаткан фейк маалыматтар тууралуу маалымдады.
ИИМдин басма сөз кызматы берген маалыматка ылайык, тармакта мамлекеттик кызматкерлердин жана күч структураларынын өкүлдөрүнүн атынан жалган видеолор пайда болду, анда Кыргызстандын жарандары 60тан 150 миң сомго чейин жумасына киреше таба алаары айтылат, бул үчүн кандайдыр бир инвестициялык платформа колдонулат.
«Бул видеоматериалдар жасалма интеллект технологияларын колдонуу менен түзүлгөн жана чындыкка эч кандай тиешеси жок. Маалыматтын жалган экенин баса белгилеп кетебиз», - деп эскертет министрлик.
ИИМ жарандарыбызды кылдат болууга, шектүү тез киреше табуу сунуштарына ишенбөөгө, шектүү шилтемелерге өтүүдөн качууга жана жеке маалыматтарын ачпоого чакырат.
Мындан тышкары, министрлик жалган контенттин жайылышы боюнча текшерүү жүргүзүп, анын жыйынтыгы боюнча юридикалык баа берилет.
Расмий булактардан гана текшерилген маалыматка ишенүүнү сунуштайбыз!
