Компания долбоорго инвестициялык чыгымдар $170 миллиондон $200 миллионго чейин болушун күтүп жатат.
Компаниянын ишмердүүлүгүнүн натыйжасында республикалык бюджетке болжол менен $650-700 миллион салык түрүндө каражат бөлүнөт.
«Бул финансылык баалоолор болжолдуу болуп, учурдагы алтындын базар бааларына негизделген. Долбоорду ишке ашыруу натыйжасында 600 жаңы жумуш орду түзүлөт», — деп кошумчалашты ЗАО өкүлдөрү.
Тоголок кенин иштеп чыгуу үчүн лицензия компанияга 2023-жылдын августунда берилген, андан кийин запасдарды тастыктоо үчүн геологиялык изилдөөлөр активдештирилген. Бул изилдөөлөр ЗАО «Кумтор Голд Компани» тарабынан каржылык колдоо менен жүргүзүлүүдө.
Учурда Ак-Шийрак айылынан 35 чакырымдык электр өткөргүчтөрдү тартуу боюнча даярдык иштер жүрүп жатат. Мындан тышкары, Сары-Бель аймагында 10 мегаватттык подстанция жана жылына 500 миң тонна руда иштетүүчү алтын заводун куруу пландалууда.
Ошондой эле, Уч-Кошкон айылынан кенге чейин техникалык жолдун долбоору иштелип жатат, жаңы Кайчи дарыясынан өтүүчү көпүрө курулууда.
Бул жылы Тоголокто масштабдуу тоо-кен иштер башталат, ал эми биринчи руда 2026-жылы күтүлүүдө, биринчи Доре куймасы болсо 2027-жылы чыгарылат.
Кенди иштетүү долбоору 16 жылга эсептелген жана эки этапта ишке ашырылат, ал учурда 16 тоннадан ашык алтын өндүрүү пландалууда:
- биринчи этап — 6 тонна алтынды ачык ыкма менен жети-сегиз жылдын ичинде;
- экинчи этап — 10 тоннадан ашык алтынды жер астында иштетүү ыкмасы менен.
