Кыргызстанда экспорттук документтерди даярдоодо кыйынчылыктарга дуушар болгон жергиликтүү ишкерлерге жардам көрсөтүү үчүн Экономика жана соода министрлигинде (ЭСМ) оперативдик штаб иштеп жатат. Бул тууралуу ИА «Кабар» маалымат агенттигинде өткөн пресс-конференцияда «Кыргыз экспорт» экспортту өнүктүрүү жана илгерилетүү борборунун директору Урмат Такиров билдирди. Ал штабды түзүү боюнча демилге Казакстан менен чектешкен жерде Россия Федерациясынын Федералдык бажы кызматынын жаңы мобилдик топторун киргизүүгө жооп катары пайда болгонун белгиледи. «Евразия экономикалык биримдигинин алкагында экспорттук документтерди даярдоодо талаптар катуулаштырылган, бул бир катар ишкерлер үчүн кыйынчылыктарды жаратууда», - деп түшүндүрдү ал.
Штаб Экономика жана соода министрлигинин имаратында жайгашкан жана күн сайын 19:00гө чейин иштейт.
Ишкерлер тез арада консультация алуу үчүн 0 550 305 305 номерине чалса болот. Бул телефон аркылуу Россияга экспорт үчүн документтерди даярдоодо суроолор же көйгөйлөр пайда болгондо жардам алууга болот.
«Консультациялык колдоодон тышкары, штаб экспорттук документтерди туура даярдоо боюнча окутуучу семинарларды өткөрөт. Бул иш-чаралар Бишкек жана Ош шаарларында болуп өтүп, 740 катышуучуну чогултту.
Окутуу ар кандай мамлекеттик органдардын өкүлдөрү, анын ичинде бажы жана салык кызматтары менен биргеликте уюштурулган. Ошондой эле семинарларда «Честный знак» маркировка системасынын өкүлдөрү катышып, ЕАЭБ өлкөлөрүнө экспорттолгон товарларды маркировкалоо боюнча талаптарды түшүндүрүшөт», - деп кошумчалады Урмат Такиров.
Экономика жана соода министрлиги оперативдик штабдын максаты бизнес үчүн административдик тоскоолдуктарды азайтуу жана кыргызстандык компанияларды сырткы рыноктордо колдоо экенин баса белгилейт.
