Бүгүн, 22-январда, Жогорку Кеңештин жыйынында депутаттар «Эмгекти коргоо» мыйзам долбоорун биринчи окууда талкуулап, кабыл алышты.
Мыйзам долбоорунун демилгечиси - Кыргызстандын премьер-министри.
Мыйзам долбоору тууралуу маалыматты Эмгек, социалдык камсыздандыруу жана миграция министринин орун басары Камчыбек Досматов сунуштады.
Мыйзам долбоору жумушчулар үчүн ден соолукка жана коопсуздукка ылайык шарттарды түзүүгө, өндүрүштө кырсык учурларын жана кесиптик ооруларды алдын алууга, ошондой эле эмгекти коргоо системасын ишканалар жана мамлекет деңгээлинде жакшыртууга багытталган. Мыйзам долбоору эмгектин коопсуздук нормаларынын жана стандарттарын сактоону көзөмөлдөө үчүн укуктук негизди түзөт жана жумуш берүүчүлөрдүн эмгек шарттарынын абалы үчүн жоопкерчилигин жогорулатууга шарт түзөт.
Талкуу учурунда депутат Суйунбек Омурзаков сунушталган мыйзам долбоорунун нормаларын Эмгек кодексинин жоболоруна ылайык келтирүү керектигин белгиледи. Депутат Камила Талиева тиешелүү мыйзамга ылайык актыларды кайра карап чыгуу зарылдыгын баса белгиледи. «Бул мыйзам долбоору боюнча парламенттик угулуштарды өткөрүү керек», - деп белгиледи Камила Талиева.
Депутат Карыбек уулу Улукбек өндүрүштө кырсыктардын алдын алуу механизмдерин тактады. Депутат Гулшаркан Култаева жылдык акы төлөнүүчү отпусктан жумушчуну чакырып алуу тартиби боюнча суроолорду көтөрдү. Депутат Токтобубу Ашымбаева эмгектин коопсуздук нормаларынын жана стандарттарын сактоону көзөмөлдөө механизмдери боюнча суроолорду көтөрүп, мыйзам долбооруна өз сунуштарын киргизерин кошумчалады. Депутат Медербек Алиев жайында температура жогорулаганда карыялар жана хроникалык оорулары бар адамдар үчүн жумуш убактысын кыскартуу маселесин карап чыгууну сунуштады.
Жогорку Кеңеш ошондой эле «Кыргыз Республикасынын кээ бир мыйзам актыларынын күчүн жоготкондугун таануу» мыйзам долбоорун экинчи окууда карап, кабыл алды.
Мыйзам долбоорунун демилгечиси - Премьер-министр.
Мыйзам долбоору тууралуу маалыматты Жогорку Кеңештин Конституциялык мыйзамдар, мамлекеттик түзүлүш, жергиликтүү өз алдынча башкаруу жана Регламент боюнча комитетинин орун басары Кубанычбек Самаков сунуштады.
Мыйзам долбоору менен төмөнкү мыйзамдардын күчүн жоготкондугу таанылат: республикалык бюджеттердин аткарылышы боюнча отчетторду бекитүү жөнүндө, анткени бул мыйзамдар өзүнүн күчүндө чектелген жана бүгүнкү күндө актуалдуу эмес; амнистия жөнүндө, анткени бул мыйзамдар өз милдетин аткарган; мыйзамдарды түшүндүрүү жөнүндө, анткени бул мыйзамдар өз күчүн жоготкон.
