Жогорку Кенештин спикери Марлен Маматалиев Бишкектеги мектеп директорлору менен жолугушуу өткөрдү.
Парламенттин жыйындар залында өткөн жолугушууда 1-марттан башталуучу «Таза шаар» конкурсу тууралуу маалымат талкууланды. Приздүү орундарды ээлеген мектептер маанилүү сыйлыктарды алышат.
«Акыркы жылдарда президент Садыр Жапаров айлана-чөйрөнү коргоо жана жашыл экономикасын өнүктүрүү боюнча бир катар ири чараларды баштады. Ошондуктан көптөгөн иш-чаралар уюштурулууда. Мен «Таза шаар» конкурсу бул башталыштардын улантуусу болуп, биздин борбордогу экологиялык абалды жакшыртууга жардам берет деп ишенем», — деп белгиледи спикер.
Мындан тышкары, ал билим берүү тармагын өнүктүрүү маселесин көтөрдү.
«Бул жылы мугалимдердин маянасын жогорулатуу пландалууда, жана бул болгону башталышы. Биз ар тараптуу колдоону улантабыз. Жогорку Кенеш мугалимдердин эмгек шарттарын жакшыртуу жана билим берүү секторун өнүктүрүү үчүн мыйзамдык базаны бекемдөөгө активдүү иш алып барат. Замандын талаптарына жооп берүү үчүн тиешелүү мыйзамдарга өзгөртүүлөрдү киргизүү убактысы келди», – деп баса белгиледи ал.
Спикер ошондой эле мектеп окуучуларынын жүрүм-турумуна байланыштуу көйгөйлөр тууралуу да айтты. Ал мугалимдерди жалгыз гана күнөөлөөгө болбойт деп эсептейт.
«Балдардын тарбияланышынын негиздери үй-бүлөдө алынат экенин унутпашыбыз керек. Эгер тарбия процессине ата-энелер, мугалимдер жана коомчулук тартылса, биз жакшы муунду тарбиялай алабыз», - деп кошумчалады ал.
Жолугушуунун аягында Марлен Маматалиев «Таза шаар» конкурсуна катышуучуларга ийгилик каалады.
«Бул сынак биздин шаардагы тазалыкты сактоого гана эмес, жаш муунду аң-сезимдүү жарандар болуп, экологияга кам көрүүгө шыктандырат. Эмгек — балдардын келечегинин негизи, ал алардын коомго болгон жоопкерчилигин өнүктүрөт. Мындай демилгелерди башка аймактарга да жайылтуу керек. Биз өлкөбүздү жашыл жана гүлдөгөн мамлекетке айландырууга умтулуу керек. Биздин улуу муундун өкүлү Искак Раззаков айткандай: «Эгер сен таза болсоң, эгер мен таза болсом, анда коом да таза болот». Ар бирибиз айлана-чөйрөгө кам көрүүгө жана өлкөнүн өнүгүшүнө өз салымыбызды кошууга милдеттүүбүз», - деп жыйынтыктады спикер.
Эскерте кетсек, пластик калдыктарын чогултуу боюнча конкурс 2026-жылдын 1-мартынан 1-майына чейин өтөт. Эң көп пластик таштандыларды чогулткан мектеп жеңүүчү болот.
Проект Жогорку Кенештин, Бишкек мэриясынын, Министрлер кабинетинин алдындагы Физикалык тарбия жана спорт мамлекеттик агенттигинин, ошондой эле Кыргызстандагы Кызыл Жарым Ай коомунун колдоосу менен ишке ашырылууда.
Марлен Маматалиев ошондой эле резервдик фондунан финансылык колдоо көрсөтүүгө даяр экенин билдирди.
