25-мартта Кыргызстандын президенти Садыр Жапаров Швейцариялык SICPA SA компаниясынын башкы директору жана башкармалыктын төрагасы Филипп Амон менен жолугушуу өткөрдү. Бул тууралуу мамлекет башчынын администрациясынан маалымат алынды.
Жолугушууда биргелешкен инициативаларды ишке ашыруу, инновациялык технологияларды киргизүү жана мамлекеттик башкаруунун натыйжалуулугун жогорулатуу жана өлкөнүн экономикалык коопсуздугун бекемдөө боюнча тажрыйба алмашуу маселелери талкууланды.
Президент табигый ресурстарды натыйжалуу пайдалануу, ачыктыкты камсыз кылуу жана экономикасынын негизги секторлорунда заманбап ыкмаларды киргизүү мамлекеттик саясаттын эң маанилүү аспекттери экенин баса белгиледи.
Бул контекстте кен казып алуу секторунун туруктуу өнүгүшү, анын ачыктыгы жана инвестицияларды тартуу, ошондой эле ишенимдүү өнөктөштөр менен кызматташтыкты бекемдөө биринчи кезектеги мааниге ээ экени белгиленди.
Жолугушуу учурунда Филипп Амон мамлекеттин экономикалык жана цифралдык суверенитетин бекемдөөгө, экономикалык процесстердин ачыктыгын жогорулатууга жана мамлекеттик башкарууну оптималдаштырууга багытталган заманбап технологиялык чечимдерди көрсөттү.
Бюджет кирешелерин жогорулатуу, салык администрирлөөсүн жакшыртуу, көлеңкөлүү экономиканы азайтуу жана товарлардын агымын контролдоону күчөтүү мүмкүнчүлүктөрү да талкууланды.
Мындай чечимдердин киргизилиши экономикалык коопсуздукту бекемдөөгө жана мыйзамсыз ишмердик менен күрөшүүгө, ошондой эле мамлекеттик институттардын натыйжалуулугун жогорулатууга көмөктөшөрү баса белгиленди.
Жолугушуунун аягында эки тарап кызматташтыкты кеңейтүүгө жана биргелешкен долбоорлорду ишке ашырууга кызыкдар экенин билдиришти.
Эскерте кетсек, SICPA SA - контрабанда жана контрафакттык продукция менен күрөшүүгө, ошондой эле салык төлөөдөн качууну алдын алууга багытталган технологияларды иштеп чыгуучу Швейцариядагы алдыңкы компаниялардын бири.
