Жүрөк хирургиясы жана органдарды трансплантациялоо боюнча илимий-изилдөө институтунда бүгүн жаңы жетекчи — Жалил Шейшеновдун презентациясы өттү. Иш-чаранын жүрүшүндө саламаттыкты сактоо министринин биринчи орун басары Айбек Маткеримов кардиологиялык жардам системасынын биргелешип иштөөсүнүн маанилүүлүгүн белгиледи.
Кыска маалымат:
Шейшенов Жалил Орозобекович,
1975-жылы туулган, улуту кыргыз,
жогорку медициналык билимге ээ.
1999-жылы И. К. Ахунбаев атындагы Кыргыз мамлекеттик медициналык академиясында «Дарылоо иши» адистиги боюнча билим алган. 1999-2002-жылдары Улуттук кардиология жана терапия борборунун илимий-билим берүү борборунда «Жүрөк-кан тамыр хирургиясы» боюнча клиникалык ординатурадан өткөн.
2002-2007-жылдары ушул эле институттун жүрөк оорулары боюнча бөлүмүндө кардиохирург болуп иштеген.
Андан кийин, 2007-2021-жылдары Казакстандын Тараз шаарындагы Жүрөк хирургиясы жана трансплантологиясынын илимий-клиникалык борборунун кардиохирургия бөлүмүнүн жетекчиси болуп иштеген. 2021-2023-жылдары ушул борбордун дарылоо иштери боюнча директордун орун басары болгон.
2023-жылдан 2026-жылдын январь айына чейин «Бишкек Кардио» илимий-клиникалык борборунун башкы дарыгери болуп иштеген.
2012-жылы Россия Федерациясынын Жогорку аттестациялык комиссиясында кандидаттык диссертациясын коргогон. Шейшенов төрт инновациялык патенттин автору жана 40тан ашык илимий макалалардын, ошондой эле эл аралык конференцияларда берилген 12 докладдын автору.
2010-2023-жылдары Казакстандын Жамбыл облусунун Саламаттыкты сактоо башкармалыгында кардиохирургия боюнча башкы адис жана көз карандысыз эксперт болуп иштеген.
Шейшенов EACTS (Европа кардиоторакалык хирургдар ассоциациясы) жана EAACTS (Евразия кардиоторакалык хирургдар ассоциациясы) илимий коомдорунун мүчөсү.
Анын жүрөк хирургиясы боюнча негизги багыттары:
- туулган жүрөк кемтиктерин хирургиялык дарылоо;
- мини-инвазивдүү кардиохирургия.
Казакстандагы иши учурунда ал Казакстан Республикасынын Саламаттыкты сактоо министрлигинин Ардак грамоталары жана «Саламаттыкты сактоонун мыктысы» белгиси менен сыйланган.
