Институттун директору Данияр Каскеев 1984-жылы курулган имараттын азырынча капитальный ремонттон өтпөгөнүн билдирди. Анткен менен, институт активдүү иштеп жатат жана жыл сайын өлкөнүн ар кайсы бурчтарынан 13 миңден ашык бейтапты тейлейт.
Жыйында депутат Гулнара Баатырова институттун коомчулук үчүн маанилүүлүгүнө көңүл буруп, бейтаптар үчүн ыңгайлуу жана жеткиликтүү шарттарды түзүүнүн зарылдыгын белгиледи. Ал ошондой эле баатыр эне-аталар үчүн акысыз дарылоо маанилүүлүгүн жана институтту тез жардам унаалары менен камсыздоонун зарылдыгын айтты.
Башка депутат Гулкан Молдобекова бейтаптардын тамак-ашына бөлүнгөн каражаттын жетишсиздигинен улам тынчсыздануусун билдирип, бул каражаттарды көбөйтүүнү сунуштады. Ал ошондой эле медициналык кызматкерлер үчүн турак жайдын жетишсиздиги маселесин көтөрдү.
Депутат Токтобубу Ашымбаева институт бальнеология жана реабилитация тармагында жетекчи илимий-медициналык борбор экенин белгилеп, бейтаптар үчүн ыңгайлуу шарттарды түзүүнүн зарылдыгын айтты. Ал медициналык кызмат көрсөтүүнүн сапатын жогорулатуу, айрыкча балдар жана мүмкүнчүлүгү чектелген адамдар үчүн маанилүүлүгүн баса белгиледи.
Комитеттин мүчөлөрү Кыргыз илимий-изилдөө курортология жана реабилитация институтунда жабдууларды жаңылоону, капитальный ремонт жүргүзүүнү, медициналык кызматтарды жакшыртууну жана кызматкерлердин айлыктарын жогорулатуу боюнча чараларды кабыл алуунун зарылдыгына бир пикирге келишти.
