Бишкекте мугалимдер үчүн «Манас» эпосун заманбап жана интерактивдүү үйрөтүү ыкмаларына арналган семинар өттү.
«Манас» академиясынын маалыматына ылайык, бул иш-чаранын негизги максаты санариптик технологиялар жана педагогикадагы жаңы ыкмаларды колдонуу менен эпосту окутуунун сапатын жакшыртуу болду.
Тренингге манасчылар катышып, семинарды Кыргыз Республикасынын эмгек сиңирген артисти Самат Кочорбаев, Данияр Карабаев жана Чынара Салиева өткөрүштү.
Интерактивдүү оюндан кийин катышуучулар Самат Кочорбаевдин «Манас» эпосунун тарыхы боюнча лекциясын угушту. Андан кийин, топтук талкуулар жана тестирлөө алкагында окутуунун көйгөйлөрү жана жаңы ыкмалары изилденди.
Иш-чаранын практикалык бөлүгүндө мугалимдер ар кандай оюндарды, текстти санариптик анализдөө үчүн инструменттерди (мисалы, Voyant жана AntConc) жана заманбап сабак пландарын иштеп чыгуу жана коргоо үчүн искусственный интеллект жана онлайн платформаларды колдонушту.
Иш-чара жалпы талкуу, пикир алмашуу жана катышуучуларга сертификаттарды тапшыруу менен аяктады.
«Катышуучулар санариптик жана интерактивдүү ыкмаларды үйрөнүп, «Манас» эпосун активдүү окутуу үчүн практикалык инструменттерди алышты», - деп айтылат маалыматта. ```
