Бишкекте Кыргызстан профсоюздар федерациясынын төрагасы Мурадил Джумадилде уулу жана Эл аралык эмгек уюму (ЭМТ) Европа жана Борбордук Азия секторунун жетекчиси Сергеюс Гловацкас биргелешкен иш-чаралар планына кол коюшту.
Профсоюздар федерациясы тарабынан берилген маалыматка ылайык, бул документ өлкөдөгү социалдык-эмгек мамилелерин өнүктүрүүгө, жумушчулардын укуктарын коргоого, калыс эмгекти илгерилетүүгө жана профсоюздардын коомдогу позицияларын бекемдөөгө багытталган бир нече демилгелерди камтыйт.
Мурадил Джумадилде уулу бул документ Кыргызстандагы профсоюздук кыймылдын прогресси үчүн жаңы горизонтторду ачарын белгиледи.
«ЭМТ менен кызматташтык биз үчүн чоң мааниге ээ. Кол коюлган план жумушчулардын эмгек укуктарын коргоону жакшыртууга, профсоюздардын мүмкүнчүлүктөрүн кеңейтүүгө жана алдыңкы эл аралык практикаларды киргизүүгө мүмкүндүк берет», — деп кошумчалады ал.
Анын айтымында, биргелешкен демилгелер социалдык адилеттүүлүктү күчөтүүгө жана жумушчулардын укуктарын коргоону жогорулатууга жардам берет.
Сергеюс Гловацкас болсо Кыргызстан менен өнөктөштүктүн маанилүүлүгүн баса белгилеп, мындан аркы кызматташууга даяр экенин билдирди.
«Биз Кыргызстан менен болгон кызматташтыгыбызды жогору баалайбыз. Кол коюлган план калыс эмгектин принциптерин ишке ашырууга, социалдык диалогду жакшыртууга жана эмгек рыногунун туруктуу өнүгүүсүн колдоого багытталган», — деди ал.
Жиында ошондой эле эмгек мамилелеринин актуалдуу маселелери, профсоюздардын заманбап коомдогу ролу жана мындан аркы өз ара аракеттенүү мүмкүнчүлүктөрү талкууланды.
Кызматташтык планы эл аралык тажрыйба алмашууну, окутуу программаларын жана семинарларды уюштурууну, профсоюздук уюмдардын потенциалын жогорулатууну жана мамлекеттик органдар, иш берүүчүлөр жана жумушчулар ортосунда социалдык диалогду өнүктүрүүнү колдоону карайт.
