Министрликте тарифтер боюнча учурдагы абалды түшүндүрүштү
Энергетика министрлиги өлкөдөгү электр энергиясынын тарифтери бир нече жыл бою чыныгы өздүк наркынан төмөн болуп келгенин билдирди. Бул бюджеттик каражаттардын эсебинен айырманы жабууну талап кылып, энергетика секторунда финансылык кыйынчылыктарды жаратууда.
Ведомствонун маалыматы боюнча, акыркы жылдарда өлкөнүн энергетика тармагында маанилүү өзгөрүүлөр болуп жатат. Тарифтик саясатты 2025-жылы кайра карап чыгуу менен байкалаарлык прогресс болду, бул инфраструктураны жаңылоого жана техникалык базаны чыңдоого түрткү берди.
“Электр энергиясы бүгүнкү күндө жөн гана кызмат эмес, мамлекетибиздин экономикалык коопсуздугунун негизги элементтеринин бири. Биз электр тармактарын активдүү модернизациялап жатабыз: аймактарда подстанциялар жаңыланууда, эски трансформаторлор жаңы менен алмаштырылууда, ошондой эле авариялык өчүрүүлөрдү азайтуу үчүн автоматташтырылган башкаруу системалары киргизилүүдө. Бул айрым аймактарда электр энергиясын камсыздоонун ишенимдүүлүгүн кыйла жакшыртты. Мындан тышкары, техникалык жоготууларды азайтуу үчүн заманбап эсептегичтер активдүү орнотулууда, санариптик көзөмөл механизмдери кеңейүүдө. Адистердин пикири боюнча, мындай чаралар электр энергиясын рационалдуу пайдаланууга гана эмес, бүт система боюнча иштин ачык болушун камсыз кылууга да жардам берет”, - деп белгилешти Минэнергодо.
«Улуттук электр тармагы Кыргызстан» ААКсынын маалыматына ылайык, өткөн жылы өндүрүштүк жабдууларды жаңылоого жана капиталдык оңдоого чоң суммадагы каражат жумшалган. Стратегиялык маанидеги бир нече объекттерди реконструкциялоо электр энергиясын өндүрүүнүн ишенимдүүлүгүн жогорулатууга жана авариялык кырдаалдардын санын азайтууга мүмкүндүк берди.
Бул жетишкендиктер тарифтик саясатты кайра карап чыгуу аркылуу мүмкүн болду.
Министрлик ошондой эле 2025-жылдын 1-майынан тартып, керектөөчүлөр үчүн тариф 1,11 сомдон 1,37 сомго чейин, кВт⋅ч үчүн 23,8% га жогорулаганын эске салды. Бул жогорулатуу үй-бүлө бюджеттерине олуттуу жүк жараткан жок, бирок секторду модернизациялоо үчүн кошумча ресурстарды камсыз кылды.
“Мындай кичине жогорулатуу энергетика секторуна масштабдуу инвестициялык жана техникалык долбоорлорду ишке ашырууга мүмкүнчүлүк берди”, - деп баса белгилешти ведомстводо.
сүрөт www
