Саламаттык сактоо министри Каныбек Досмамбетов «Максат» борборун барып көрүп, иштөө шарттары жана келечектеги өнүгүү үчүн арналган инфраструктура менен таанышып чыкты.
Жаңы шаарчанын негизги максаты – балдар церебралдык паралич, аутизм спектринин бузулуулары, Даун синдромунан жана өнүгүүнүн кечигүүсүнөн жабыркаган балдарга комплексдүү жардам көрсөтүү, ошондой эле башка ооруларды дарылоо.
Шаарча стационардык, амбулатордук жана күндүзгү реабилитация үчүн адистештирилген борборлорду камтыйт. Анын структурасына РАС жана Даун синдромунан жабыркаган балдар үчүн коррекциялык борбор, 150 орундуу ДЦП менен жабыркаган балдар үчүн заманбап борбор, ошондой эле ата-энелер жана медициналык кызматкерлер үчүн жатакана кирет. Мындан тышкары, билим берүү жана методикалык блоктор каралган.
Шаарча ичинде реабилитациялык залдар, гидротерапия үчүн бассейн, физикалык терапия жана кинезотерапия блоктору, массаж, физиотерапия, сенсордук интеграция, эрготерапия, логопедия жана психология кабинеттери, ошондой эле эмгек терапиясы зоналары түзүлөт. Реабилитация жана оюндар үчүн ачык мейкиндиктер иппотерапия элементтерин да камтыйт, бул балдардын физикалык жана психоэмоционалдык абалын жакшыртууга жардам берет.
Шаарчанын ишинин негизинде далилдүү медицина принциптери, көп тармактуу мамиле жана үй-бүлөлөрдү активдүү тартуу менен индивидуалдык реабилитациялык программалар болот.
Реабилитология тармагындагы адистерди окутууга жана квалификациясын жогорулатууга, ошондой эле үй-бүлөгө багытталган жардам моделин өнүктүрүүгө чоң көңүл бурулат, бул туруктуу кадрдык потенциалды түзүүгө мүмкүндүк берет.
Бул долбоор балдардын ден соолугун коргоо, медициналык реабилитация жана кадрларды даярдоо боюнча мамлекеттик саясатка толук жооп берет жана өлкөнүн башка аймактарында дагы ишке ашыруу үчүн үлгү катары каралат.
Бул долбоорду ишке ашыруу реабилитациялык жардамдын сапатын жана жеткиликтүүлүгүн кыйла жогорулатат, балдардын функционалдык жана социалдык калыбына келүү көрсөткүчтөрүн жакшыртат, ошондой эле дарылоо процессинде үй-бүлөнүн ролун бекемдейт жана балдардын реабилитологиясы боюнча улуттук компетенция борборун түзөт.
