Turmushтун кабарчысы менен болгон маегинде ал Кореядагы жашоосу жана кызыктуу учурлары тууралуу бөлүштү.
«Мен 1992-жылы Ош облусунун Ноокат районундагы Кара-Таш айылында төрөлгөм. Жогорку билимди Ош мамлекеттик педагогикалык институтунда англис тили факультетинде алдым, ошол жерде чет тилдерге болгон кызыгуум пайда болуп, дүйнө таанымым кеңейди. Бирок мен жашоо сабактары да билимдин маанилүү бөлүгү деп эсептейм. Соңку жылдары мен тилдерди үйрөнүүгө жана тарыхый жана аналитикалык чыгармаларды окууга өзгөчө көңүл буруп жатам», - деди ал.
Анын айтымында, ал Кореяга 2022-жылы көчүп келген.
«Кореяга келүү менин жашоомдогу маанилүү кадам болду. Жаңы маданият, чөйрө жана жашоо ритми мен үчүн чакырык гана эмес, өзүмдү тереңирээк түшүнүүгө мүмкүнчүлүк болду. Мен бул жолду өзүмдүн жеке өнүгүүм үчүн аң-сезимдүү түрдө тандап алдым», - деп белгиледи кыз.
Учурда Жыпара Кореяда үй-бүлөсү менен жашайт, анын уулу жана кызы бар.
Мындан тышкары, ал Кореядагы балдарды тарбиялоо тууралуу айтып берди.
«Менин кызым жакында экинчи классты аяктайт, ал эми уулум үч жашта. Мен үчүн балдарымдын өсүп, окуп, өнүгүп жатканын көрүү чоң жоопкерчилик жана мотивация. Чет өлкөдө үй-бүлөм менен жашоо мага тарбиянын, сабырдуулуктун жана бири-бирибизди колдоонун маанилүүлүгүн үйрөттү.
Кореяда балдарга өтө олуттуу мамиле жасашат. Бул жактагы билим берүү системасы күчтүү, ал эми атаандаштык жогору. Эрте жаштан баштап балдарды тартипке, эмгекке жана жоопкерчиликке үйрөтүшөт, ошол эле учурда алардын коопсуздугуна жана психологиялык абалына көңүл бурулат. Бирок мындай система ата-энелерден чоң сабырдуулукту талап кылат», - деп кошумчалады ал.
Жыпара ошондой эле Кыргызстан менен Кореянын окшоштуктары жана айырмачылыктары тууралуу байкоолорун бөлүштү.
«Окшоштуктардын бири - үй-бүлөгө жана улууларга болгон урмат. Эки өлкөдө да салттар жана тартип маанилүү роль ойнойт. Бирок Кореяда тартип жана тактык байкалат, ал эми Кыргызстанда адамдардын жылуу мамилеси жана эркин мүнөзү көбүрөөк сезилет», - деп түшүндүрдү ал.
Ал Кореяга көчүп келгенден кийинки кызыктуу учурларды да эске алды.
«Мен жаңы келгенде, көптөгөн кызыктуу учурлар болду. Алардын бири азыркыга чейин мени күлдүрөт: "отурушка" (кара касса) мен суммады туура эмес атап, ыңгайсыз кырдаалга туш болдум. Корейлер акчаны белгилөө үчүн татаал терминдерди колдонушат. Мисалы, 10 миң вонду мен адатта "10 сом" деп атадым. Аял мени түшүнбөй, мен муну кайра-кайра кайталап жаттым.
Экинчи күлкүлүү учур, мен корей тилин үйрөнө баштаганда болду. Мен ооруканага келип, "кимчи" деп ишенимдүү айттым, "жөтөл" деген сөздү айтуунун ордуна, ал корей тилинде "гичим" деп айтылат», - деди ал.
Жыпара өзүнүн өзүн-өзү өнүктүрүү менен алектенүүнү улантып жатканын жана келечекте пайдалуу долбоорлорду ишке ашырууну пландап жатканын кошумчалады.
«Менин жашоом өзүн-өзү өнүктүрүүгө, чыгармачылыкка жана билим алууга багытталган. Тилдерди үйрөнүү, контент түзүү жана идеяларды алмашуу мен үчүн жөн гана жумуш эмес, жашоо образы.
Келечекте мен мааниси бар жана мага, ошондой эле айланамdakыларга жардам бере турган долбоорлорду ишке ашыргым келет. Мен ийгилик акча же даңкта эмес, ички тынчтыкта жана адамдарга оң таасир көрсөтүүдө деп эсептейм», - деп жыйынтыктады ал.
