Саламаттык сактоо министринин биринчи орун басары Тилек Мамадалиев Кыргызстанда медициналык объектилердин курулушу улантылып жатканы тууралуу «Ишеним» жана «Ала-Тоо» депутаттык топторунун биргелешкен жыйынында билдирди.
Ал Бишкекте инфекциялык клиникалык оорукананын базасында жаңы корпус курула баштай турганын, анын курулушу быйылкы жылдын аягына чейин аякталат деп пландалганын белгиледи. Проект 2023-жылы кол коюлган келишимдин алкагында Түштүк Кореянын колдоосу менен ишке ашырылат жана 27 миллион долларлык жеңилдетилген кредиттин эсебинен каржыланат. Бул каражаттар курулушка жана медициналык кызматкерлерди окутууга жумшалат.
Мындан тышкары, Талас жана Ош облустарында 14,5 миллион евро суммасында медициналык мекемелерди куруу боюнча долбоорлорду ишке ашыруу улантылууда, алар кийинки жылдын биринчи кварталында ачылышы керек.
Мамадалиевдин маалыматына ылайык, 2025-жылы мамлекеттик жана донордук программалардын алкагында 10 жаңы объект пайдаланууга берилет, анын ичинде үй-бүлөлүк жана перинаталдык борборлор, инфекциялык жана төрөт бөлүмдөрү, ошондой эле Кара-Балта шаарында туберкулезге каршы ооруканасы.
Ал ошондой эле Ош облусундагы клиникалык оорукананын 300 орундуу корпусунун жана Кара-Суу шаарындагы үй-бүлөлүк медициналык борбордун курулушу аяктоого жакын экенин кошумчалады.
