Кыргыз Республикасынын Эмгек, социалдык камсыздоо жана миграция министрлигинде «Ортолук Азиядагы жашыл экономика үчүн жашыл көндүмдөр» регионалдык долбоорун ишке ашыруу боюнча келишимге кол коюлду. Бул долбоор Германиянын эл аралык кызматташтык коомдоштугу (GIZ) менен кызматташтыкта ишке ашырылууда.
Келишимдин кол коюу аземине министр Канат Сагынбаев, министрликтин кызматкерлери жана GIZдин регионалдык долбоорунун жетекчиси Удо Фолькерс катышты.
Министр бул келишим өнөктөштүк мамилелерди бекемдөөгө маанилүү кадам экенин жана кесиптик билим берүүнү өнүктүрүү үчүн жаңы мүмкүнчүлүктөрдү жаратарын белгиледи. «Жашыл» секторлор үчүн кадрларды даярдоого жана жумушчу күчүнүн атаандаштыкка жөндөмдүүлүгүн жогорулатууга чоң көңүл бурулат.
Долбоордун негизги максаты - туруктуу экономикага өтүү контекстинде заманбап компетенцияларды өнүктүрүү. Ал күн энергиясы технологиялары, энергияны үнөмдөө, ошондой эле суу ресурстарын жана калдыктарды башкаруу сыяктуу тармактарда адистерди даярдоону камтыйт.
