Prevention Mediaнын маалыматына ылайык, колдонмолор медиа өкүлдөрүнө, санариптик материалдардын авторлоруна, пресс-кызматкерлерине жана укук коргоо органдарынын кызматкерлерине багытталган. Алардын негизги максаты — сезимтал маселелер боюнча иш алып баруу үчүн практикалык сунуштарды берүү жана экстремисттик идеяларды жайылтуу коркунучун минималдаштыруу.
«Бул колдонмолор жөн гана теориялык билимдер эмес, адистердин күнүмдүк ишинде колдонсо боло турган практикалык инструменттер. Алар жооптуу коммуникацияны түзүүгө жардам берет, ошондой эле радикалдашуу мүмкүнчүлүгүн азайтууга жана туруктуу маалыматтык чөйрөнү түзүүгө көмөктөшөт. Экстремизмге каршы натыйжалуу профилактика маалыматка системалык мамиле кылууну жана медиа менен мамлекеттик органдар арасында активдүү кызматташтыкты талап кылат», — деп белгилешти уюмдан.
Материалдарда медиа менен укук коргоо органдарынын өз ара аракеттенүүсүнө өзгөчө көңүл бурулган, бул коомдун туруктуулугунун маанилүү факторы катары каралат.
Колдонмолор контент авторлоруна медиа мыйзамдарын жакшыраак түшүнүүгө, конституциялык укуктарды аңдоого жана татаал темаларды талкуулоодо профессионалдык этиканы сактоого жардам берет, жек көрүү риторикасынан качууга мүмкүндүк берет. Ошол эле учурда милиция кызматкерлери укук коргоо боюнча мамилелерди жана заманбап коммуникация принциптерин үйрөнүшөт, медиага маалымат булагы катары гана эмес, маанилүү өнөктөш катары карашат.
Кийинки этап — бул колдонмолорду КР Ички иштер министрлигинин Академиясынын окуу курстарына жана медиа тармагындагы адистер үчүн квалификацияны жогорулатуу программасына киргизүү. Бул коомдогу конфликт деңгээлин төмөндөтүүгө, ишенимди бекемдөөгө жана коопсуз маалыматтык мейкиндикти түзүүгө жардам берет деп күтүлүүдө.
