Министрликтин маалымат кызматы билдиргендей, Кендирбаева борбордун имаратын, анын ичинде иш бөлмөлөрүн жана тегерегиндеги аймакты карап чыкты, ошондой эле жамаат менен жолугушуу уюштурду.
Бул күнү өткөн жыйынга министрликтин негизги башкармалыктарынын жетекчилери, борбордун өкүлдөрү, ошондой эле Кыргыз билим берүү академиясынын жана профессионалдык лицейлердин №94, №91 жана №20 делегаттары катышты.
Жолугушуу учурунда борбордун ишмердүүлүгү боюнча маселелер талкууланды, министр иштин жакшыртылышы боюнча бир катар көрсөтмөлөрдү берди. Негизги милдеттер катары: шахмат секциясын киргизүү боюнча планды иштеп чыгуу, мугалимдер үчүн комплекс методикалык колдоо түзүү, педагогдордун квалификациясын жогорулатуу программасы, мугалимдер жана окуучулар үчүн спартакиадаларды уюштуруу, ошондой эле санариптик көндүмдөрдү өнүктүрүү белгиленди.
Кендирбаева борбордун имараты капиталдык оңдоону талап кыларын белгилеп, бул маселе боюнча тиешелүү мамлекеттик органдарга расмий кат жөнөтүү ниетин билдирди.
«Биздин өлкөдө мугалимдерди даярдоо жана физикалык тарбия менен алектенүүчү борбор керек. Ишти жүргүзүү үчүн саясат, стратегия, ошондой эле көрсөтмөлөр жана жоболорду иштеп чыгуу маанилүү. Бул ишмердүүлүк балдар бакчаларын жана жалпы билим берүү мекемелерин камтышы керек. Интеллектуалдык жана улуттук оюндар аркылуу жаш балдарды өнүктүрүү үчүн методикаларды түзүү зарыл», - деп баса белгиледи ал.
Мындан тышкары, министр профессионалдык лицей №20нын окуу жайларын, аймагын жана жатаканасын зыярат кылып, билим берүү процессин жакшыртуу боюнча сунуштарды берди.
