Уюмдун маалымат кызматы билдиргендей, иш-чарага министрлер деңгээлинде катышуучу өлкөлөрдүн делегациялары чогулуп, экономикалык кызматташтыкты өнүктүрүү, соода байланыштарын тереңдетүү жана түрк дүйнөсүндө туруктуу жана инклюзивдүү өсүүнү колдоо маселелерин талкуулашты.
«ТМУнун Башкы катчысы Кубанычбек Омуралиев өз сөзүндө региондун экономикалык өсүшүнүн туруктуу темптерин көрсөтүп жатканын белгиледи. Ал 2025-жылга чейин орточо өсүш 6,86 пайызды түзөт деп күтүлүп жатканын айтты, бул дүйнөлүк орточо көрсөткүчтөрдөн эки эсе ашык. Ошондой эле башкы катчы катышуучу өлкөлөрдүн ортосундагы өз ара сооданы жогорулатуу боюнча аракеттерди активдештирүүгө чакырды», — деп айтылат билдирүүдө.
Отурумдун жүрүшүндө делегаттар регионалдык жана глобалдык деңгээлдеги актуалдуу экономикалык тенденцияларды талкуулашты. Ошондой эле ТМУнун алкагында өз ара сооданы күчөтүү, бизнес жана инвестициялык климатты жакшыртуу, транспорт жана логистика инфраструктурасын өнүктүрүү боюнча практикалык кадамдар каралды. Катышуучулар соода тоскоолдуктарын азайтуу, кичи жана орто бизнеске колдоо көрсөтүү жана чек арадан өткөрүү соодасын жеңилдетүү боюнча аракеттерди координациялоонун зарылдыгын белгилешти.
Делегациялар ТМУнун алкагында экономикалык интеграцияны тереңдетүүгө болгон берилгендигин билдиришти жана жалпы приоритеттерди ишке ашыруу үчүн тиешелүү механизмдер аркылуу кийинки кызматташуу боюнча макулдашышты.
Жыйналыштын жыйынтыгы менен 14-отурумдун коммюникеси, соода боюнча өз ара түшүнүшүү меморандуму жана экономика, соода, инвестициялар жана финансылар боюнча кызматташуу үчүн комплексдүү жол картасы, ошондой эле ТМУ Trade Nexus форумунун концепциясы сыяктуу негизги стратегиялык документтер бекитилди.
