Жаңы жылдык кабыл алууда Кыргыз Республикасынын тышкы иштер министри Жээнбек Кулубаев заманбап дүйнө олуттуу трансформацияларга туш болуп жатканын, бул глобалдык туруктуулуктун өсүшүнө жана эл аралык коопсуздук чөйрөсүндөгү жаңы чакырыктарга алып келерин белгиледи.
Ал учурдагы эл аралык мамилелер жана жамааттык коопсуздук системасы регионалдык конфликттер, климатка байланыштуу коркунучтар жана жаңы технологиялардын тез өнүгүшү себептүү олуттуу сыноолорго дуушар болуп жатканын айтты. Бул контекстте министр эл аралык уюмдардын, айрыкча Бириккен Улуттар Уюмунун маанилүүлүгүнө көңүл бурду, көп тараптуу институттарга болгон сын-пикирлерге карабастан, алар глобалдык кырсыктардын алдын алуу үчүн негизги инструменттер бойдон калууда деп билдирди.
Министр ошондой эле Кыргызстан 2027-2028-жылдарга БУУнун Коопсуздук Кеңешине убактылуу мүчө болууга өзүнүн кандидатурасын сунуштаганын эске салды. Бул органга шайлоо 3-июнда Нью-Йорктогу БУУнун штаб-квартирасына пландаштырылган. Тышкы иштер министри кыргыз тараптын кеңири эл аралык колдоо алуу үчүн бардык мүмкүнчүлүктөрдү жасай турганына ишенерин жана достук мамиледеги өлкөлөрдөн жана өнөктөштөрдөн колдоо күтөөрүн билдирди.
Өзүнүн сөзүнүн аягында министр дипломатиялык миссиялардын башчыларына жана эл аралык уюмдардын өкүлдөрүнө эки тараптуу жана көп тараптуу кызматташтыкты өнүктүрүүгө кошкон салымдары үчүн ыраазычылык билдирди жана Кыргыз Республикасынын жана анын дипломатиялык кызматынын тынчтык, коопсуздук жана туруктуу өнүгүү максатында ачык жана конструктивдүү диалогго даяр экенин билдирди.
