Мурда автовокзалда туалет жок болчу, жана бул маселе боюнча тургундар бир нече ирет жергиликтүү бийликтерге кайрылышкан.
Шаардыктардың айтымында, орнотулган туалет өтө тар болуп калган: ичинде «да бир метр жок». Алар бул туалетти шашылыш жасашканын жана ал негизги талаптарга жооп бербестигин айтышууда.
Ноокаттын тургуну Турсуналы Ажыкулов, жергиликтүү тургундар мындай туалеттин орнотулушун шылдың катары кабыл алышканын белгиледи. «Азыр бизде талаптарга жооп берген автовокзал жок. Биз аны мамлекетке бир жылдан ашык убакыт мурун кайтарганбыз. Жүргүнчүлөр кыйынчылыктарды баштан кечирүүдө, жолдордо тыгындар пайда болууда. Автовокзалдын аймагы чоң, бирок асфальт жок, даже щебень да алып келген эмес. Ал эми туалетти жасап койду — уят. Даже кедейдин да туалети мындай эмес», - деди ал.
Анын айтымында, автовокзалдынын жалпы аянты 57 сотка. «Аймак чоң. Унаалар эркин кирип-чыгып, нормалдуу иштей алышы керек. Бирок шарттар жок. Бир жагынан адамдар өздөрү тосмо куруп алышкан. Мэрия 500 миң сом бөлгөн, бирок туалет жана инфраструктураны жакшыртууга акча каралган эмес», - деп кошумчалады Ажыкулов.
Видеоматериалда айтылган цифраларга ылайык, туалет болжол менен 8 миң сомго түшкөн. Автовокзалда шарттарды түзүү, анын ичинде туалет куруу талабы бир нече жолу көтөрүлгөн, бирок ал аткарылган эмес.
Автовокзалда шарттардын жоктугунан такси жана коомдук транспорт трассанын жээгинде токтоого мажбур, бул болсо, жергиликтүү тургундардын айтымында, Ноокат шаарынан өтүп жаткан участкеде жол тыгындарын жаратууда.
Ноокат шаарынын мэри Аскарали Абдибаев орнотулган туалет убактылуу пайдалануу үчүн гана арналганын билдирди. Анын айтымында, автовокзалды толук оңдоо жана талаптарга ылайык келтирүү үчүн болжол менен 30 млн сом керек. «Автовокзал жеке менчикте болгон, анын аймагында АЗС да жайгашкан. Биз сот аркылуу кыйынчылык менен объектти мамлекетке кайтарганбыз. Азыр, автовокзалды толук тартипке келтирүү үчүн 30 млн сом керек. Шаардык бюджет 90 млн сом, анын 85% социалдык коргоого кетет. Ошондуктан ири долбоорлорду ишке ашырууга мүмкүнчүлүк жок», - деп түшүндүрдү мэр.
Ноокат шаарынын мэри Аскарали Абдибаев
Ал автовокзал боюнча долбоор даярдалып, мамлекеттик деңгээлде каралууга жөнөтүлгөнүн кошумчалады. «Эгер акча бөлүнсө, биз тез арада эл аралык талаптарга жооп берген автовокзалды курамыз. Ал эми азыркы чечим — бул убактылуу чара», - деп маалымдады Аскарали Абдибаев.
Жаңы автовокзал долбоорунда бардык кызматтарды санариптештирүү жана автоматташтыруу каралган. Бирок негизги проблема азырынча каржылоонун жетишсиздиги болуп турат.
