Жолугушуунун негизги темалары мамлекеттик-жеке өнөктөштүк (ГЧП) мүмкүнчүлүктөрү жана түз чет элдик инвестицияларды тартуу болду. Тараптар ошондой эле Taifaxian Group компаниясы чоң тажрыйбага ээ болгон курулуш жана энергетика тармактарында стратегиялык кызматташтыкты өнүктүрүү жөнүндө сүйлөштү.
Сабиров Кыргызстан ишенимдүү эл аралык инвесторлорду тартууга кызыкдар экенин жана инвестициялык долбоорлорду ишке ашыруу үчүн жагымдуу шарттарды сунуштоого даяр экенин белгиледи.
Ал: «Биздин өлкөдө инвестициялар боюнча жаңы мыйзам кабыл алынды, ал ачык инвестициялык климатты түзүүгө багытталган. Бул мыйзам инвесторлордун жана алардын инвестицияларынын укуктарын коргоону камсыз кылат, ошондой эле түз инвестициялар жана ГЧП долбоорлору үчүн эшиктерди ачат» - деп айтты.
Жолугушуунун жүрүшүндө Чаткал жана Жогорку Нарын гидроэлектр станцияларынын каскаддарын куруу, «Ала-Тоо Резорт» туристтик долбоорун өнүктүрүү, «Ат-Башы» Эл аралык соода-логистикалык борборун түзүү, «Топурак-Бел» жел электр станциясын куруу, Турксиб — Балыкчы темир жол бөлүгүн жана «Асман Сити» долбоорун ишке ашыруу сыяктуу бир нече ири инвестициялык демилгелер сунушталды.
Бул долбоорлор Кытай делегациясынын жандуу кызыгуусун жаратты, талкуулоодо компаниялардын аларды ишке ашыруудагы катышуу форматы, анын ичинде ГЧП жана түз инвестициялар механизмдери каралды.
Жолугушуунун жыйынтыгы боюнча тараптар кызматташтыктын конкреттүү багыттарын, анын ичинде курулуш, энергетика жана шаардык инфраструктура тармактарындагы долбоорлорду изилдөө боюнча өз ара кызыгууларын растады.
Компания жөнүндө маалымат: Shaanxi Taifaxian Industrial Group Co., Ltd. 1983-жылы негизделген жана Кытайдагы эң ири жеке диверсификацияланган өнөр жай-инвестициялык топтордун бири болуп саналат. Ал Шэньси провинциясында гана эмес, өлкөнүн башка аймактарында да иш алып барат, региондогу жылжымайтын мүлк жана энергетика тармактарында 50 алдыңкы компаниянын катарында орун алат.
Топтун негизги иш багыттары төмөнкүлөрдү камтыйт:
• турак жай, коммерциялык жана инфраструктуралык объектилерди куруу;
• энергетикалык долбоорлорду ишке ашыруу;
• инвестициялык жана девелопердик иш;
• комплексдүү долбоорлорду башкаруу.
