Талас облусунун тургундары КРнын омбудсмени Жамили Джаманбаевге эмгек укуктарын коргоо боюнча кайрылышты. Акыйкатчы институтунун пресс-кызматы бул тууралуу маалымдады.
21 жумушчу өз арызында 5-16-январь күндөрү мамлекеттик ипотекалык компаниянын долбоору боюнча көп кабаттуу үйдүн курулушунда иштегенин айтты. Бирок 16-январда күтүүсүздөн жумуштан бошотулуп, алардын ордуна башка өлкөдөн 60тан ашык жумушчу тартылган.
Жумушчулар менен эмгек келишимдери түзүлгөн эмес, бирок жумуш убактысын эсепке алуу журналы жүргүзүлгөн жана алардын эмгек ишмердүүлүгүн тастыктаган фото- жана видеоматериалдар бар экенин белгилешти. Алар укуктарын калыбына келтирүү жана кайра жумушка орношуу боюнча жардам сурашты.
Акыйкатчы институту эмгек мыйзамдарын көзөмөлдөө жана текшерүү кызматына, мамлекеттик ипотекалык компанияга, облустук прокуратурага жана Талас облусундагы президенттин ыйгарым укуктуу өкүлчүлүгүнө расмий суроолорду жөнөттү.
ГИКтен келген жоопто, аталган компания курулуштун заказчысы экендиги, ал эми курулуш иштерин мамлекеттик “Кыргызстройсервис” ишканасы жүргүзөрү маалымдалды. Текшерүү учурунда мурдагы курулуш компаниясы долбоордон чыгып кеткендиги жана объект жаңы подрядчыга өткөрүлгөндүгү аныкталды.
Институттун кайрылуусунан кийин, жаңы подрядчы жергиликтүү тургундарды жумушка алууга макул болду, эгерде аларда зарыл болгон квалификация жана тажрыйба болсо.
Февралдын башында арыз берүүчүлөр кайра жумушка алынганын билдиришти жана акыйкатчыга көрсөткөн жардамы үчүн ыраазычылык билдиришти.
