Бул маалымат Turmush агенттигинин райондук билим берүү бөлүмүнө таянып берилди.
Бөлүмдүн маалыматына ылайык, жалпы билим берүү мектептеринде окуган өспүрүм кыздардын арасында «Эрте боюнан алуу» жана «Эрте нике» сыяктуу маанилүү темалар боюнча профилактикалык иш-чаралар өткөрүлүүдө. Бул көрүнүштөр алардын жашоосунда олуттуу көйгөйлөрдү жаратышы мүмкүн экени баса белгиленет.
Мындай иш-чаралардын биринде мектептин социалдык педагогдору «Эрте боюнан алуу жана анын кесепеттерине» арналган презентация даярдап, аны окуучуларга сунуштады. Ошондой эле жолугушууга дарыгерлер катышып, эрте никеге кирүүнүн кесепеттерин түшүндүргөн маанилүү кеңештерди беришти.
Райондун бардык билим берүү мекемелеринде эрте никенин кесепеттерин талкуулоого арналган тарбиялык сааттар, талкуулар жана тегерек столдор өткөрүлүүдө. Презентациялар даярдалып, видеороликтер көрсөтүлүп, талкуулар активдүү өтүүдө.
Кээ бир адистер эрте боюнан алуунун кесепеттери тууралуу маалыматтарды да бөлүшүштү.
«Эрте боюнан алуу же өспүрүм курагында боюнан алуу кыздын ден соолугуна, билимине жана келечегине олуттуу таасир этет», - деп айтылат билдирүүдө.
Ден соолукка болгон кесепеттер:
- Организмдин жетилбегендиги кыйын төрөткө алып келиши мүмкүн;
- Анемия жана жалпы алсыздык болушу мүмкүн;
- Боюнда болгондо кыйынчылыктар, анын ичинде кан басымдын жогорулашы сыяктуу кыйынчылыктар пайда болушу мүмкүн;
- Бала убагында төрөлбөй же аз салмакта төрөлүшү мүмкүн;
- Кээ бир учурларда энеге же балага өмүргө коркунуч туудурат.
Психологиялык кесепеттер:
- Стресс, коркуу жана уят болуу сезими;
- Депрессия же жалгыздык сезими;
- Үй-бүлө жана коом тарабынан басым.
Социалдык кесепеттер:
- Көптөгөн кыздар окуусун токтотууга мажбур болушат;
- Кесип алуу мүмкүнчүлүгү төмөндөйт;
- Каржылык кыйынчылыктар пайда болушу мүмкүн;
- Жаш үй-бүлөлөрдө ажырашуу коркунучу жогорулайт.
Баланын келечегине таасири:
- Баланын ден соолугунда көйгөйлөр пайда болушу мүмкүн;
- Эне баласына толук кам көрүүдө кыйынчылыкка учурашы мүмкүн.
