Инспекция учурунда Анкара көчөсү, 2; Анкара көчөсү, 3/6; Анкара көчөсү, 3а даректериндеги бир нече курулуштарда мыйзам бузуулар аныкталды, бул жерлерде ондон ашык блоктон турган турак комплекси курулууда.
Министрликтен белгилешкендей, көрсөтүлгөн объектилерде курулуш мыйзамдары жана коопсуздук нормалары боюнча олуттуу мыйзам бузуулар катталган. Мындан тышкары, компания курулуш этаптарын текшерүү үчүн жеке лабораторияларды колдонгон. Ошондой эле, комплекстин кээ бир блоктору мыйзамсыз түрдө үлүш ээлерине өткөрүлүп берилгендиги министрликтин маалыматына ылайык белгилүү болду.
Текшерүүнүн натыйжаларына ылайык "Аалам Строй" компаниясына 3 миллион сом өлчөмүндө айып пул салынды. 20-январда бул маселе лицензияны 90 күнгө токтотуу чечими кабыл алынган комиссиянын жыйынында талкууланды.
