МПСтин башкы катчысы Мартин Чунгонг Нью-Йорктогу БУУнун штаб-квартирасына чыгып, шайланган расмий адамдарга карата агрессиянын өсүп жатканын белгиледи.
«Интернет мейкиндигинде зомбулукка кабылган учурлардын саны кыйла көп: беш өлкөдө депутаттардын 65тен 70% ы интернетте кемсинтүү учурларын белгилешти», — деди ал.
Изилдөө Аргентина, Бенин, Италия, Малайзия жана Нидерландия сыяктуу өлкөлөрдө жүргүзүлгөн парламент мүчөлөрүнүн суроолоруна жана терең анализдерге негизделген.
Кысымдын эң көп кездешкен формалары — кемсинтүү, жаман комментарийлер, жалган маалыматтарды таратуу жана коркутуулар. Сураштырууга катышкан көпчүлүк катышуучулар абалдын күндөн-күнгө начарлап бара жатканын билдиришти. Аргентина жана Нидерландияда депутаттардын 80% га жакыны акыркы беш жылда зомбулук өсүп жатканын айтты.
«Интернеттеги зомбулук көбүнчө шайлоо мезгилинде, кызуу парламенттик талкуулар учурунда же саясий жана маданий темалар боюнча поляризацияланган талкуулар жүрүп жатканда күч алат», — деп белгиледи Мартин Чунгонг.
Отчет ошондой эле бул маселедеги гендердик аспекттерди карайт.
Аял депутаттар кол салууларга көбүрөөк кабылышат: сураштырууга катышкан аялдардын 76% ы жана эркектердин 68% ы зомбулукка дуушар болгонун билдиришти.
Мартин Чунгонг бул тенденциянын демократиялык институттар үчүн олуттуу коркунуч туудурарын эскертти.
Көптөгөн сураштырууга катышкан парламент мүчөлөрү өздөрүнүн жүрүм-турумун өзгөртүшкөнүн билдиришти. «Алар интернетте өз-өзүн цензуралоону практикалоо башташты жана коомдук билдирүүлөрүндө көбүрөөк этият болушту», — деди ал.
Бул айда Женевада жайгашкан МПС БУУнун Нью-Йорктогу штаб-квартирасына жылдык парламенттик угуларын өткөрүүдө. Иш-чарага дүйнөнүн төрт тарабынан болжол менен 150 парламент мүчөсүн камтыган 250 катышуучу чогулат деп күтүлүүдө.
