Бишкекте БУУнун өнөр жайды өнүктүрүү боюнча эл аралык эксперттеринин миссиясы алкагында уюштурулган жыйын өттү. Жыйынга Экономика министрлигинин, Саламаттык сактоо министрлигинин жана жергиликтүү фармацевтикалык компаниялардын өкүлдөрү катышты, деп билдирет Кыргыз Республикасынын Экономика министрлигинин басма сөз кызматы.
Жыйында фармацевтика тармагын өнүктүрүү маселелери көтөрүлүп, Евразия экономикалык биримдигинин GMP стандарттарына болгон талаптары жана фармацевтика тармагындагы өндүрүштү модернизациялоону колдоо механизмдери талкууланды.
Ошондой эле «Кыргыз Республикасынын фармацевтика өнөр жайын туура өндүрүш практикасынын талаптарына ылайык келтирүүнү күчөтүү: баалоо жыйынтыктары, эл аралык стандарттар жана кийинки кадамдар» темасында семинар өткөрүлдү, ага мамлекеттик органдардын өкүлдөрү, фармацевтикалык продукция өндүрүүчүлөр жана эл аралык эксперттер катышты.
ЮНИДО эксперттери отандык фармацевтикалык ишканалардын GMP стандарттарына ылайык келүүсүнүн баалоо жыйынтыктарын бөлүшүп, бул тармактагы эл аралык стандарттар жана жөнгө салуу практикаларын талкуулашты.
GMP стандарттарын киргизүүгө өзгөчө көңүл бурулду, бул дары-дармек сапатынын жана коопсуздугунун жакшыртууда, ошондой эле кыргыз өндүрүүчүлөрүнүн Евразия экономикалык биримдигинин рыногунда экспорттук мүмкүнчүлүктөрүн кеңейтүүдө маанилүү кадам болуп саналат.
Катышуучуларга ЮНИДО тарабынан фармацевтикалык өндүрүүчүлөр арасында жүргүзүлгөн суроо алуу жыйынтыктары да сунушталды, ал GMP стандарттарын киргизүүгө даярдык деңгээлин аныктоого жана өндүрүш процессин өнүктүрүү жана модернизациялоо үчүн зарыл болгон негизги багыттарды аныктоого багытталган.
Миссия алкагында ЮНИДО эксперттери GMP стандарттарын киргизүү деңгээлин баалоо жана техникалык жана эксперттик колдоо боюнча муктаждыктарды аныктоо максатында өлкөнүн фармацевтикалык ишканаларына техникалык визиттерди пландашты.
Бул инициативаларды ишке ашыруу медициналык препараттардын сапатынын жана коопсуздугунун жогорулашына, улуттук фармацевтика өнөр жайын өнүктүрүүгө жана жергиликтүү өндүрүүчүлөрдүн экспорттук потенциалын жогорулатууга алып келет деп күтүлүүдө.
