Жолугушууда токтоп турган кубаттуулуктардын ишин калыбына келтирүү механизмдери каралды. Колдонуусуз калган өндүрүш аянттарын экономикалык жүгүртүүгө тартуу маселелери талкууланды. Аймакта өнөр жай максатында көптөгөн объектилер бар экендиги, аларда өнүккөн инженердик жана транспорттук системалар, ошондой эле ыңгайлуу жайгашкандыгы белгилүү болду. Ошол эле учурда инвесторлор даяр аянтчалардын жетишсиздигин сезишет, бул аларды айыл чарба жерлерин трансформациялоого мажбурлап, өз долбоорлорунун ишке ашуу мөөнөттөрүн узартат.
Бул жагдайда токтоп турган ишканалар аймакты кайра өнөр жайлаштыруу үчүн маанилүү элемент катары каралууда.
Президенттин өкүлү Азамат Осмонов мамлекеттин максаты менчикти алуу же кайра бөлүштүрүү эмес экенин баса белгиледи. Президенттин өкүлчүлүгү диалогдун демилгечиси жана ачыктыкты кепилдөөчү катары чыгып, потенциалдуу инвесторлор менен сүйлөшүүлөрдө ээлердин кызыкчылыктарын коргоого даяр.
Ишканалардын ээлерине инвесторлор менен ыктыярдуу кызматташуу механизмин сунушташты. Бул механизм ар кандай өз ара аракеттешүү формаларын камтыйт: ижара, биргелешкен ишканаларды түзүү, үлүштү сатуу же активдерди толук сатуу. Кызматташтык меморандумдар менен, эгер зарыл болсо, келишимдер менен расмийленет.
Президенттин өкүлчүлүгүнүн өкүлдөрү бул демилгенин ишке ашырылышы жаңы жумуш орундарын түзүүгө, салык түшүүлөрүн көбөйтүүгө, айыл чарба жерлерине жүктөмдү азайтууга жана Чүй облусунда даяр өнөр жай аянтчаларынын реестрин түзүүгө мүмкүндүк берет деп күтүшөт.
