Кандидатураны сунуштаган президент Садыр Жапаров.
Дамирбек Осмонов 1982-жылдын 12-январында Ош шаарында төрөлгөн.
1999-жылдан 2005-жылга чейин Түркияда Хаджеттепе университетинде мамлекеттик программа боюнча медициналык билим алган.
2006-жылдын апрелинен 2012-жылдын апрелине чейин Стамбулдагы Siyami Ersek кеудө жана жүрөк-кан тамыр хирургиясы боюнча илимий-изилдөө борборунда резидентурадан өткөн.
2012-жылдын апрелинен ноябрына чейин Стамбулдагы Taksim German Hospitalда кардиология боюнча иштеген.
2012-жылдын ноябрынан 2015-жылга чейин Алматыдагы «Сема» клиникасынын кардиология бөлүмүн жетектеген.
2016-жылдын мартынан бери кардиолог, функционалдык диагностика дарыгери, интервенциялык кардиолог, инвазивдик аритмолог жана «БИКАРД» клиникасынын башкы дарыгери кызматтарын аркалап келет.
Мындан тышкары, Осмонов Европалык кардиологдор коомунун (FESC), Европалык жүрөк ритми ассоциациясынын (EHRA) жана Америкалык кардиологдор колледжинин мүчөсү болуп саналат.
Ошондой эле, ал World Research Journal of Cardiology эл аралык басылмасынын башкы редактору жана Асфендияров атындагы Казак улуттук медициналык университетинин визитинг-профессору.
Өткөндө ал Саламаттык сактоо министрлигинин илимий кеңешинин мүчөсү болгон.
2022-жылдын декабрь айында президент Садыр Жапаров аны «Данк» медалы менен сыйлады.
Дамирбек Осмонов саламаттык сактоо министри кызматында 2025-жылдын 1-декабрынан 2026-жылдын 24-февралына чейин ушул кызматты аркалаган Каныбек Досмамбетти алмаштырды.
