Мыйзам долбоору өкмөт тарабынан даярдалган жана анын өкүлү Эмгек министрлиги болуп саналат. Документтин жаңы версиясы Эмгек кодексинен эмгекти коргоо боюнча 29 статьяны алып салуунун натыйжасында иштелип чыккан жана мыйзамдарды эл аралык стандарттарга ылайык келтирүүгө багытталган.
Эмгекти коргоо менен байланышкан такталган түшүнүктөрдүн тизмесине коопсуз жумуш шарттары, зыяндуу жана кооптуу өндүрүш факторлору, кесиптик коркунучтар, ошондой эле жумуш орундарын аттестациялоо кирет. Мыйзам кеңири катмардагы адамдарга: жумушчуларга, жумуш берүүчүлөргө, кооперативдердин мүчөлөрүнө, студенттерге, практикадан өтүүчүлөргө, аскер кызматкерлерине, түрмөдөгү адамдарга жана чет өлкөлүк компаниялардын кызматкерлерине таралат.
Мыйзам долбоору мамлекеттин саясатынын приоритеттерине, мисалы, жумушчулардын жашоосун жана ден соолугун коргоого, нормалардын сакталуусун көзөмөлдөөгө жана текшерүүгө, кырсыктарды иликтөөгө, ошондой эле зыяндуу жумуш шарттары үчүн компенсацияларга жана адистерди окутууга көңүл бурат. Жумушчулар коопсуз жумуш ордуна, жумуш шарттары тууралуу маалымат алууга, жеке коргоо каражаттарына, кооптуу жумуштан баш тартууга жана маянасы сакталган медициналык текшерүүдөн өтүүгө укук алышат.
Жумуш берүүчүлөр коопсуз жумуш шарттарын түзүүгө, атайын кийимдерди жана коргоочу каражаттарды берүүгө, инструкттаждарды жана окутууларды уюштурууга, ошондой эле медициналык текшерүүлөрдү жана жумуш орундарын аттестациялоону өткөрүүгө милдеттүү. Техникалык мүмкүнчүлүк болсо, окутуу онлайн форматта жүргүзүлүшү мүмкүн. Зыяндуу шарттарда иштеген кызматкерлер үчүн бекер сүт жана медициналык-профилактикалык тамак-аш каралган.
Бул мыйзамдын аткарылышын мамлекеттик органдар көзөмөлдөп, текшерүүлөрдү жүргүзүүгө, буйруктарды берүүгө жана жумушчулардын жашоосуна жана ден соолугуна коркунуч туулганда ишмердүүлүктү токтотууга укуктуу. Профсоюздар жана уюмдардын ыйгарым укуктуу өкүлдөрү да коомдук көзөмөлгө катышуу мүмкүнчүлүгүнө ээ болушат. Жумуш берүүчүлөр жумуш ордунда жумушчуларга келтирилген зыян үчүн, анын ичинде кесиптик оорулар жана жаракаттар үчүн жоопкерчилик тартат.
Жаңы мыйзамдын кабыл алынышы 2003-жылдан бери иштеп келген «Эмгекти коргоо жөнүндө» мыйзамды жана анын бардык кийинки өзгөртүүлөрүн жокко чыгарат. Жаңы мыйзам жарыяланган күндөн 10 күн өткөндөн кийин күчүнө кирет, ал эми Кабмин алты айдын ичинде өзүнүн нормативдик актыларын жаңы редакцияга ылайыкташтырууга милдеттүү. Маалыматка ылайык, мыйзам кырсыктарды жана кесиптик ооруларды алдын алууга багытталган, кошумча бюджеттик каражаттарды талап кылбайт жана терс социалдык же экономикалык кесепеттерди жаратпайт.
