Бул документ мамлекеттик кызматтардын Бирдиктүү реестринин 66-пунктуна ылайык иштелип чыккан жана министрликтин карамагындагы билим берүү мекемелеринде кошумча кесиптик билим берүүнү камсыз кылуу боюнча бирдиктүү талаптарды белгилөөгө багытталган.
Долбоор боюнча, бул кызматты алуу укугу 18 жашка толгон жана кесиптик билим берүү дипломуна ээ болгон жарандарга берилет. Окутууну жана аттестацияны ийгиликтүү өткөндөр кошумча кесиптик билим берүү боюнча сертификаттарды же күбөлүктөрдү ала алышат.
Стандартта окутуу шарттарына коюлган талаптар, анын ичинде жабдылган аудиториялар жана лабораториялар, компьютердик техника, китепкана, окуу планнары жана квалификациялуу окутуучулар составынын болушу көрсөтүлгөн. Ошондой эле, ден соолугунун мүмкүнчүлүктөрү чектелген адамдар үчүн билим берүү ресурстарына жетүүнү камсыз кылуу боюнча талаптар өзүнчө белгиленген.
Окутуу программаларынын узактыгы 72 академиялык сааттан кем болбошу керек. Ошол эле учурда, документтерди кабыл алуу жана жыйынтыкты берүү үчүн бөлүнгөн максималдуу убакыт 60 мүнөттөн ашпашы керек. Кызмат традициялык форматта, ошондой эле толугу менен же жарым-жартылай электрондук түрдө, алыстан окутуу технологияларын колдонуу менен көрсөтүлүшү мүмкүн.
Билим берүү уюмдары өз кызматтарынын баалары жөнүндө маалыматты расмий сайттарында жана маалымат стенддеринде жарыялоого милдеттүү. Ошондой эле, дискриминациянын жоктугу, белгиленген мөөнөттөрдүн сакталуусу жана арыздар менен сунуштар китебинин болушу сыяктуу сапат параметрлери белгиленет.
Долбоордо кызмат көрсөтүүдөн баш тартуу эрежелери жана даттануу механизмдери да каралган. Жазуу түрүндөгү даттануулар 14 күндүн ичинде каралышы керек.
