Кыргызстандын Эмгек, социалдык өнүктүрүү жана миграция министрлиги мамлекеттик социалдык заказдын алкагында жаңы социалдык долбоордун — 5200 номерлүү 24/7 ысык линиясын ачканын жарыялады.
Маалыматка ылайык, бул линия үй-бүлөлүк зомбулукка жана адамдарды соодалоого кабылган жарандарга тез жана сапаттуу жардам көрсөтүү үчүн түзүлгөн.
5200 номерине чалган ар бир адам акысыз, анонимдүү жана купуя колдоо ала алат. Линияда зомбулук, кризистик кырдаалдар жана психологиялык жардам берүү боюнча атайын даярдыктан өткөн квалификациялуу психологдор жана консультанттар иштешет.
Ысык линия 24/7, дем алышсыз жеткиликтүү жана өлкөнүн бардык аймагында бардык мобилдик операторлор аркылуу иштейт.
Анын негизги иш багыттары төмөнкүлөрдү камтыйт:
- зомбулукка жана пайдалануучулукка кабылган жарандарга психологиялык колдоо;
- жапа чеккендердин укуктарын коргоо боюнча жеткиликтүү кызматтар жана чаралар тууралуу маалымат;
- коопсуз башпаанек, медициналык жана юридикалык жардам боюнча консультациялар;
- зомбулукка күбө болгон жакындарына жана күбөлөргө колдоо.
