Тагаевдин маалыматына ылайык, мурда 4 миллион сом бөлүнсө, азыр жаштар саясатына бюджет 50 миллион сомду түзөт.
Мындан тышкары, министрлик мамлекеттик социалдык заказ механизмдери аркылуу жаштардын демилгелерин да колдойт.
«2023-жылдан тартып жаштар уюмдары арасында конкурс өткөрүүнү баштадык. Эң мыкты долбоорлор 1 миллион сомго чейин каржыланууга ээ болушу мүмкүн. 2025-жылы 10 миллион сомго 11 демилге колдоого алынды», — деп кошумчалады ал.
Министрдин орун басары ошондой эле өлкөнүн мыйзамдарына Кыргызстан жаштар кыймылынын түшүнүгү киргизилгенин жана 2024-жылы анын биринчи курултаю өткөнүн маалымдады. Учурда өлкөдө 86 жаштар кыймылынын өкүлчүлүгү иштеп жатат, ошондой эле жергиликтүү бийлик органдарынын алдында жаштар кеңештери түзүлгөн. Тагаев бул өкүлдөрдүн, Маданият министрлигинин колдоосу менен, ар кандай иш-чараларды уюштуруп, көптөгөн долбоорлорду ишке ашырып жатканын баса белгиледи.
Ал өз сөзүндө 2020-2030-жылдарга карата кабыл алынган жаштар саясатынын концепциясын эске салды, ал жаштар үчүн мүмкүнчүлүктөрдү кеңейтүү, жумушка орношуу деңгээлин жогорулатуу, билим берүү процессин жана жалпы өнүгүүнү камтыйт.
Ар эки жылда «Кыргызстан жаштарынын бакубаттуулук жана өнүгүү индекси» боюнча улуттук изилдөө жүргүзүлөт. Соңку жолу 2025-жылы өткөрүлүп, жыйынтыктары 2026-жылдын январь айында сунушталган.
Ошондой эле Марат Тагаев депутаттарга жаштар үчүн конкурстар, Кыргызстандын жаш жарандарынын улуттук жана эл аралык деңгээлде кандай долбоорлорго катышып жатканы жана алардын ар кандай тармактарга кошкон салымы жөнүндө кенен айтып берди.
2025-жылга карата Кыргызстанда 14 жаштан 35 жашка чейинки 2 миллион 519 миң жаран жашайт.
